पणजी - Goa Zilla Panchayat Election Results 2025: सोमवारी 22 डिसेंबर रोजी जाहीर झालेल्या गोवा जिल्हा पंचायत निवडणुकीत भारतीय जनता पक्षाने (भाजप) भव्य विजय मिळवत 2027 मध्ये होणाऱ्या विधानसभा निवडणुकीची यशस्वी नांदी केली आहे. 50 जागांपैकी तब्बल 29 जागा जिंकून भाजप गोव्यातील सर्वात मोठा पक्ष ठरला आहे. एनडीएने 32 जागा जिंकल्या, तर काँग्रेस-गोवा फॉरवर्ड पार्टी (जीएफपी) युतीने 11 जागा जिंकल्या. मतपत्रिकेद्वारे घेतलेल्या जिल्‍हा पंचायत निवडणुकीत गोमंतकीय जनतेने भरभरून मतदान करुन गोव्यातील भाजप सरकार आणि पंतप्रधान मोदींवरील विश्‍‍वास सार्थ ठरवला असल्याची प्रतिक्रिया मुख्यमंत्री प्रमोद सांवत यांनी दिली आहे..

सर्व जागांचे निकाल जाहीर -

दक्षिण व उत्तर गोवा या दोन जिल्हा पंचायतींच्या 50 जागांपैकी भाजपने 29 जागा जिंकल्या, काँग्रेसने 10 जागा जिंकल्या, तर अपक्षांनी चार जागा जिंकल्या. महाराष्ट्रवादी गोमंतक पक्षाने (एमजीपी) तीन जागा जिंकल्या, रिव्होल्यूशनरी गोअन्स पार्टीने (आरजीपी) दोन जागा जिंकल्या आणि गोवा फॉरवर्ड पार्टी (जीएफपी) आणि आम आदमी पार्टी (आप) यांनी प्रत्येकी एक-एक जागा जिंकली. या निवडणुकीत भाजपने एमजीपीसोबत युती करून निवडणूक लढवली, तर काँग्रेसने पारंपरिक प्रतिस्पर्धी जीएफपीसोबत या निवडणुकीसाठी युती करून जोरदार तयारी केली होती. 

जिल्हा पंचायतीच्या या निवडणुकांना राजकीयदृष्ट्या खूप महत्त्व प्राप्त झाले होते कारण 2027 मध्ये होणाऱ्या आगामी विधानसभा निवडणुकीपूर्वी जनतेच्या कलाचे मापन करणारे एकक म्हणून त्याकडे पाहिले गेले. विशेष म्हणजे 2012 पासून गोव्यात भाजपची सत्ता आहे. दरम्यान, राज्‍यातील विरोधी पक्ष असलेल्‍या काँग्रेसने मागील जिल्‍हा पंचायत निवडणुकीत केवळ चार जागा जिंकल्‍या होत्‍या. यावेळी त्यात सहा जागांची भर पडली आहे.दुसरीकडे गेल्यावेळी भाजपने 30 जागा जिंकल्या होत्या त्यातील एक कमी झाली आहे. 

मुख्यमत्री प्रमोद सावंत, राज्यातील सर्व मंत्री, आपचे संयोजक अरविंद केजरीवाल, दिल्लीच्या माजी मुख्यमंत्री आतिषी, काँग्रेस प्रभारी माणिकराव ठाकरे, प्रभारी सचिव डॉ. अंजली निंबाळकर आदी नेत्‍यांनी जिल्‍हा पंचायत निवडणुकीच्‍या प्रचारात उतरून निवडणूक प्रतिष्‍ठेची बनवली होती. 

आपची निराशाजनक कामगिरी -

    गोव्यातील दोन जिल्‍हा पंचायतींच्या 50 जागांपैकी 42 जागांवर आपने आपले उमेदवार उभे केले होते. पक्षाचे सर्वेसर्वा अरविंद केजरीवाल, माजी मुख्यमंत्री आतिशी यांनी गोव्‍यात तळ ठोकून प्रचाराचे रान उठवले होते. गोव्यातील नाईट क्ल्ब अग्निकांडावरून सत्ताधाऱ्यांवर टीकेची झोड उठवली होती. मात्र त्यांना पक्षाचा आमदार असलेला बाणावली मतदारसंघही जिंकता आला नाही. त्यांना एकमेव कोलवा येथे विजय मिळाला.

    मोदींकडून गोव्याच्या जनतेचे आभार -

    गोव्याची जनता सुशासनासोबतच प्रगतिशील राजकारणाच्या पाठीशी उभी आहे. जिल्हा पंचायत निवडणुकीत भाजप–एमजीपी (एनडीए) आघाडीला गोव्यातील जनतेने भरभरून पाठिंबा दिल्याबद्दल गोव्यातील माझ्या बंधू-भगिनींचे मी आभार मानतो. यामुळे गोव्याच्या विकासासाठीच्या आमच्या प्रयत्नांना आणखी बळ मिळेल. या सुंदर राज्यातील लोकांची स्वप्ने आणि आकांक्षा पूर्ण करण्यासाठी आम्ही कटिबद्ध आहोत. आमच्या कार्यकर्त्यांनी ग्रामीण भागात कौतुकास्पद काम केल्याचा हा परिणाम असल्याचे मोदी यांनी म्हटले आहे.