एजन्सी, लातूर: महाराष्ट्राचे माजी मुख्यमंत्री आणि ज्येष्ठ स्वातंत्र्यसेनानी दिवंगत शिवाजीराव पाटील निलंगेकर (ex CM Shivajirao Patil Nilangekar) यांच्या पत्नी सुशीलाताई यांचे निधन झाले आहे, अशी त्यांच्या कुटुंबीयांनी माहिती दिली आहे. रविवारी रात्री 8.30 वाजता लातूरमधील एका खासगी रुग्णालयात उपचारादरम्यान हृदयविकाराच्या झटक्याने त्यांची प्राणज्योत मावळली. त्या 87 वर्षांच्या होत्या.  

अशोकराव पाटील निलंगेकर यांच्या मातोश्री

सुशीलाताई निलंगेकर या महाराष्ट्र काँग्रेसचे प्रदेश सरचिटणीस अशोकराव पाटील निलंगेकर, डॉ. शरद पाटील निलंगेकर आणि महाराष्ट्र शिक्षण समितीचे अध्यक्ष विजयकुमार पाटील निलंगेकर यांच्या मातोश्री होत्या.

तसेच, माजी खासदार रूपाताई पाटील निलंगेकर (Rupatai Patil Nilangekar) यांच्या त्या सासू आणि माजी मंत्री, आमदार संभाजीराव पाटील निलंगेकर (Sambhajirao Patil Nilangekar) यांच्या आजी होत्या. त्यांच्या पश्चात तीन मुले, एक मुलगी, सूना, नातवंडे आणि जावई असा मोठा परिवार आहे.

‘आईसाहेब’ या नावाने ओळखल्या जात होत्या

    अलिकडच्या काही दिवसांपासून त्या आजारी होत्या. त्यांच्यावर लातूरमधील एका खासगी रुग्णालयात उपचार सुरू होते. मात्र, रविवारी रात्री हृदयविकाराच्या झटक्याने त्यांचे निधन झाले. त्या सर्वांना ‘आईसाहेब’ या नावाने ओळखल्या जात होत्या.

    निलंग्यातील बामणी धानोरा गावातील शेतकरी अप्पाराव धानुरे यांच्या कन्या असलेल्या सुशीलाताई यांचा विवाह 1951 मध्ये शिवाजीराव पाटील निलंगेकर यांच्यासोबत झाला. आपल्या पतीच्या राजकीय आणि सार्वजनिक जीवनात त्यांनी नेहमी खंबीर साथ दिली. त्या प्रेमळ, आदरातिथ्यशील आणि कुटुंबवत्सल गृहिणी म्हणून प्रसिद्ध होत्या.