जेएनएन, पुणे. Pranjal Khewalkar Case: ज्येष्ठ नेते एकनाथ खडसे (Eknath Khadse) यांचे जावई आणि राष्ट्रवादी काँग्रेस शरद पवार गटाच्या नेत्या रोहिणी खडसे (Rohini Khadse) यांचे पती प्रांजल खेवलकर (Pranjal Khewalkar) यांच्या अडचणी वाढताना दिसत आहेत. प्रांजल खेवलकर यांच्यावर आता मानवी तस्करी केल्याचा आरोप केला जात आहे. 

खेवलकर यांच्या विरोधात बीडमधील एका संस्थेने राज्य महिला आयोगाकडे तक्रार केली आहे. प्रज्ञा खोसरे यांच्या सानवी बहुद्देशीय सेवाभावी संस्थेकडून राज्य महिला आयोगाकडे ही तक्रार करण्यात आली आहे. या तक्रारीत म्हटले आहे की, प्रांजल खेवलकर यांनी खराडी भागातील एका हॉटेलात 28 वेळा रुम बुक केली व अनेकवेळा मुलींना बोलावल्याचा आरोपही केला आहे.  या तक्रारीनंतर महिला आयोगाने पुणे पोलिस आयुक्त मानवी तस्करी विरोधी पथक, सायबर विभागयांच्या मार्फत तातडीने चौकशी करण्याचे निर्देश दिले आहेत.

राज्य महिला आयोगाने एक्सवर पोस्ट करून खेवलकर यांच्या प्रकरणी तपासाचे निर्देश पुणे पोलिसांना दिले आहेत. खराडी परिसरात ज्या पार्टीवर छापा टाकण्यात आला त्यातील संशयित आरोपी प्रांजल खेवलकर यांनी 28 वेळा स्वतःच्या नावाने हॉटेल रुम बुक केल्याचा आरोप तक्रारीत करण्यात आला आहे. बर्‍याच वेळा परप्रांतीय मुलींना रुममध्ये बोलावल्याचे नमूद करत यामध्ये आंतरराज्यीय रॅकेट असल्याचा संशय संस्थेने व्यक्त केला आहे. यामध्ये संघटित गुन्हेगारीचे तसेच मानवी तस्करीचा संशय संस्थेने व्यक्त केला आहे.

आपलाच बॉल.. रोहिणी खडसेंची सोशल मीडिया पोस्ट -

प्रांजल खेवलकर यांच्यावर मानवी तस्करीचा आरोप केला जात असताना रोहिणी खडसे यांनी एक्सवर पोस्ट करत तीन महत्वाचे मुद्दे मांडले. त्यात म्हटले आहे की,

नुकतेच माध्यमांतून महिला आयोगाने डॉ. खेवलकर यांच्या प्रकरणात पुणे पोलीस आयुक्तांना दिलेले पत्र वाचले. 

    मुद्दा क्र. 1 ज्या सानवी बहुद्देशीय सेवाभावी संस्थेने या प्रकरणात राज्य महिला आयोगात तक्रार दाखल केली आहे. ती संस्था राष्ट्रवादी अजित पवार गटाच्या महिला विभागाच्या बीड जिल्ह्याची अध्यक्षा प्रज्ञा खोसरे यांची आहे. 

    मुद्दा क्र. 2 राज्यात महिलांच्या विरोधात इतके प्रकरण घडले, वैष्णवी हागवणे आत्महत्या प्रकरणासारखे हुंडाबळीचे प्रकरण घडले. यात खुद्द अजित पवार गटाच्या पुण्यातील महत्त्वाचे पदाधिकारी आरोपी आहेत. तेव्हा ही संस्था कुठे होती ? राज्यात महिलांवर इतके अत्याचार होतात तेव्हा ही संस्था कुठे होती ?  मग आताच ही संस्था बाहेर कशी काढली गेली ? 

    मुद्दा क्र. 3 राज्यातील अत्याचारग्रस्त महिलांची साधी विचारपूसही न करणाऱ्याला महिला आयोग अध्यक्षांना आज अचानक कसे कर्तव्य आठवले ? इतके कसे कार्यतत्पर झाले ?

    आपलाच बॉल, आपलीच बॅट आणि आपणच सिक्सर मारणार...सगळं व्यवस्थित स्क्रीप्टनुसार सुरू आहे, अशी टीका रोहिणी खडसे यांनी केली.

    कोण आहेत प्रांजल खेवलकर ?

    प्रांजल खेवलकर ज्येष्ठ नेते एकनाथ खडसे यांचे जावई तसेच राष्ट्रवादी शरद पवार पक्षाच्या महिला प्रदेशाध्यक्षा रोहिणी खडसे यांचे पती आहेत. रोहिणी खडसे यांनी पहिल्या पतीसोबत घटस्फोट घेतल्यानंतर बालपणीचा मित्र असलेल्या प्रांजल खेवलकर यांच्यासोबत लग्न केले. प्राजंल खेवलकर जमीन खरेदी विक्रीचा व्यवसाय करतात.