जेएनएन, मुंबई: आगामी स्थानिक स्वराज्य संस्थांच्या निवडणुकांच्या (Local Body Election) पार्श्वभूमीवर उपमुख्यमंत्री एकनाथ शिंदे (Eknath Shinde) यांच्या नेतृत्वाखालील शिवसेना सज्ज झाली आहे. पक्षाने आता ‘अलर्ट मोड’वर जात सर्व पदाधिकाऱ्यांना आपल्या कार्यक्षेत्रातच राहण्याचे आदेश दिले आहेत.
शाखा प्रमुखांपासून आमदार-खासदारांपर्यंत कोणालाही आपला मतदारसंघ सोडून बाहेर जाण्यास मनाई करण्यात आली आहे. हा आदेश थेट उपमुख्यमंत्री एकनाथ शिंदे यांनी दिल्याने पक्षाच्या कार्यकर्त्यांमध्ये हालचाली सुरू झाले आहेत.
स्थानिक निवडणुकांसाठी कंबर कसली!
मुंबई, ठाणे, कल्याण, पुणे आणि इतर महत्त्वाच्या महानगरपालिकांच्या निवडणुका लवकरच जाहीर होण्याची शक्यता आहे. त्यामुळे शिवसेनेनं आतापासूनच संघटनात्मक तयारी सुरू केली आहे. प्रत्येक विभाग, शाखा आणि प्रभागात कार्यकर्त्यांनी मतदारांशी संपर्क साधावा, स्थानिक प्रश्नांवर तातडीने काम करावं, आणि पक्षाची उपस्थिती मजबूत ठेवावी, असे आदेश देण्यात आले आहेत.
शिंदेंचा कडक आदेश!
पक्ष प्रमुख एकनाथ शिंदे यांनी स्पष्ट केले आहे की — “पक्षाचा प्रत्येक कार्यकर्ता निवडणूक काळात आपल्या मतदारसंघातच राहील. अपरिहार्य कारणास्तव बाहेर जावं लागल्यास त्याची माहिती मध्यवर्ती कार्यालयात कळवावी. शाखा प्रमुख, नगरसेवक, माजी नगरसेवक, आमदार, खासदार आणि पदाधिकारी यांनी ही जबाबदारी गंभीरपणे घ्यावी. हा आदेश पक्षातील सर्व संघटनात्मक घटकांना पाठवण्यात आला आहे. स्थानिक स्तरावर त्याची अंमलबजावणी सुरू झाली आहे.
संघटनात्मक तयारीला वेग!
शाखा पातळीवर बैठकांचे आयोजन करण्यात येत असून, नव्या मतदार यादीतील नावांची पडताळणी, बूथ पातळीवरील संपर्क मोहिमा आणि प्रभागनिहाय नियोजन सुरू आहे. शिवसेना शिंदे गटाकडून निवडणूकपूर्व तयारीला गती देण्यासाठी “एक कार्यकर्ता, शंभर मतदार” हे ध्येय निश्चित करण्यात आलं आहे.
पक्षातील अंतर्गत समन्वयावर भर!
शिंदे गटाने महाराष्ट्रभरातील जिल्हाप्रमुख आणि संपर्कप्रमुखांना स्थानिक पातळीवरील मतभेद मिटवून एकसंघपणे निवडणुकीला सामोरं जाण्याचे निर्देश दिले आहेत. “आमचा उद्देश केवळ सत्ता नाही, तर जनतेशी प्रामाणिक संपर्क ठेवणे आणि प्रत्येक मतदाराला विश्वास देणे हा आहे,” असे शिंदे सेनेच्या नेत्यांनी सांगितले आहे.