जेएनएन, मुंबई: आगामी महापालिका निवडणुकीच्या पार्श्वभूमीवर मुंबईतील महायुतीच्या प्रचाराचा अधिकृत मुहूर्त ठरला आहे. येत्या 3 जानेवारी रोजी मुंबईत महायुतीची पहिली जाहीर सभा होणार असून, या सभेने मुंबईतील निवडणूक प्रचाराला औपचारिक सुरुवात होणार आहे.
ही महत्त्वाची सभा वरळी डोम येथे आयोजित करण्यात आली असून, संध्याकाळी 6 वाजता सभेला सुरुवात होणार आहे. या सभेत मुख्यमंत्री देवेंद्र फडणवीस आणि उपमुख्यमंत्री एकनाथ शिंदे प्रमुख वक्ते म्हणून उपस्थित राहणार आहेत. त्यामुळे महायुतीची ताकद आणि एकजूट मुंबईकरांसमोर ठळकपणे मांडली जाणार आहे.
महायुतीच्या या पहिल्या सभेकडे राजकीय वर्तुळाचे विशेष लक्ष लागले आहे. मुंबईत जागावाटप, उमेदवार निवड आणि स्थानिक प्रश्नांवर विरोधकांकडून टीका होत असताना, या सभेतून महायुतीकडून प्रचाराची दिशा, विकासाचा अजेंडा आणि मुंबईसाठीचे व्हिजन स्पष्ट केले जाण्याची शक्यता आहे.
विशेष म्हणजे, ही सभा मुंबईतील कार्यकर्त्यांमध्ये उत्साह संचारण्यासाठी आणि महायुतीच्या उमेदवारांना बळ देण्यासाठी महत्त्वाची मानली जात आहे. भाजप, शिवसेना (शिंदे गट) आणि महायुतीतील अन्य घटक पक्षांचे नेते व पदाधिकारी मोठ्या संख्येने या सभेला उपस्थित राहणार आहेत.
आगामी दिवसांत मुंबईत महायुतीकडून विभागनिहाय सभा, रोड शो आणि प्रचार फेऱ्यांचा धडाका सुरू होणार असून, 3 जानेवारीची वरळी डोममधील सभा ही त्याची नांदी ठरणार आहे. त्यामुळे मुंबईतील राजकीय वातावरण अधिक तापण्याची चिन्हे स्पष्ट दिसत आहेत.
हेही वाचा: झेडपी निवडणुका दोन टप्प्यात होणार? अजित पवारांचे संकेत, 50 टक्के आरक्षणाचा मुद्दा ठरणार निर्णायक
हेही वाचा: BMC Election 2026: बंडखोरी शमवण्यासाठी ठाकरेंचे नेते मैदानात, प्रभागनिहाय समजूत काढण्यावर भर
