मुंबई. Hemlata Patkar arrested : मराठी कलाविश्वात खळबळ उडवून देणारी बातमी समोर आली आहे. गोरेगाव येथील एका बांधकाम व्यावसायिकाकडून 10 कोटी रुपयांची खंडणी मागितल्याच्या आरोपाखाली मुंबई पोलिसांच्या खंडणीविरोधी पथकाने दोन महिलांना अटक केली आहे. अटक केलेल्या दोन महिलांपैकी एक मराठी अभिनेत्री असल्याने या प्रकरणाने रिअल इस्टेट आणि मनोरंजन क्षेत्रात खळबळ उडाली आहे.
अटक केलेल्या आरोपींपैकी एक हेमलता पाटकर आहे, जिला हेमलता आदित्य पाटकर किंवा हेमलता बाणे म्हणूनही ओळखले जाते, तिचे वय 39 असून ती कांदिवलीची रहिवासी आहे. दुसरी आरोपी अमरीना इक्बाल झवेरी आहे, जिला अॅलिस किंवा अमरीना मॅथ्यू फर्नांडिस म्हणूनही ओळखले जाते, ती ३३ वर्ष वयाची असून सांताक्रूझची रहिवासी आहे. मुंबई गुन्हे शाखेने कथित १० कोटी रुपयांच्या खंडणी मागणीचा पहिला हप्ता, १.५ कोटी रुपये स्वीकारताना दोन्ही महिलांना रंगेहाथ पकडल्याचे वृत्त आहे.
शनिवारी (27 डिसेंबर) या दोन्ही आरोपींना एस्प्लेनेड न्यायालयात हजर करण्यात आले असता, न्यायालयाने त्यांच्या पोलिस कोठडीत सोमवारपर्यंत वाढ केली आहे.
अटक झालेल्या महिलांपैकी हेमलता पाटकर ही मराठी सिनेइंडस्ट्रीत काम करते तसेच लावणी डान्सर म्हणून कार्यरत आहे. अनेक मराठी चित्रपट व मालिकांमध्ये तिने काम केले आहे. छोट्या पडद्यावरची लोकप्रिय मालिका आई कुठे काय करते या मालिकेतही तिने काम केले आहे.
गोरेगाव पश्चिम येथील रहिवासी न बिल्डर अरविंद गोयल (वय 52 वर्षे) यांच्या मुलावर आंबोली पोलिस ठाण्यात एक फौजदारी खटला दाखल आहे. हा खटला मिटवण्यासाठी अभिनेत्री हेमलता पाटकर आणि अमरिना झवेरी यांनी गोयल यांच्याकडे तब्बल 10 कोटी रुपयांची मागणी केली होती. ही रक्कम खंडणी स्वरूपात उकळण्याचा प्रयत्न होत असल्याचे लक्षात येताच अरविंद गोयल यांनी गुन्हे शाखेकडे धाव घेतली.
पोलिसांनी न्यायालयात सादर केलेल्या माहितीनुसार, अटक करण्यात आलेल्या अभिनेत्री हेमलता पाटकर याआधीही गुन्हे प्रकरणात सामील झाली आहे. २०२१ मध्ये 10 लाखांच्या फसवणुकीबाबत तिच्यावर गुन्हा नोंद आहे. त्याचबरोबर मेघवाडी पोलिस ठाण्यात मारहाण, बेकायदेशीर प्रवेश आणि शिवीगाळ (कलम 452, 323, 504) यांसारखे गुन्हे दाखल आहेत.
