जेएनएन, पुणे: राज्यात शिक्षक भरती प्रक्रियेत पारदर्शकता राखण्यासाठी महाराष्ट्र परीक्षा परिषदेने मोठी कारवाई केली आहे. शिक्षक पात्रता चाचणी (TET) उत्तीर्ण झालेल्या 2207 उमेदवारांचा निकाल रद्द करण्यात आला आहे. दिलेल्या मुदतीत आवश्यक कागदपत्रे सादर न केल्याने ही कारवाई करण्यात आली असून संपूर्ण राज्यात या निर्णयाची चर्चा सुरू आहे.

काय आहे प्रकरण?
शिक्षक अभियोग्यता आणि बुद्धिमत्ता चाचणी (TET) उत्तीर्ण झाल्यानंतर उमेदवारांनी परीक्षा परिषदेच्या सूचनेनुसार त्यांचे शैक्षणिक, प्रशिक्षण आणि ओळखपत्रांसह इतर कागदपत्रे निश्चित मुदतीत सादर करणे आवश्यक होते. परंतु 2207 उमेदवारांकडून कागदपत्रे वेळेत सादर झाली नाहीत. सततच्या सूचना, ई-मेल आणि पोर्टलवरील अलर्ट्स देऊनही ही प्रक्रिया पूर्ण झाली नाही.परिणामी या उमेदवारांची पात्रता रद्द करून निकाल अवैध ठरवला गेला.

परीक्षा परिषदेची घोषणा
परीक्षा परिषदेने स्पष्ट केले की,राज्यातील शिक्षक भरती प्रक्रियेतील पारदर्शकता राखण्यासाठी कोणतीही तडजोड केली जाणार नाही.

2207  अपात्र उमेदवारांची यादी संकेतस्थळावर प्रसिद्ध केली आहे.आता कोणतीही विनंती, अर्ज, किंवा विशेष परवानगी विचारात घेतली जाणार नाही.

निकाल कायमस्वरूपी रद्द राहील
या निर्णयामुळे शिक्षक भरतीच्या पुढील टप्प्यात अधिक स्पष्टता येणार असल्याचे परिषदेकडून सांगण्यात आले आहे.

उमेदवारांमध्ये नाराजीचे वातावरण
2207 उमेदवारांचा निकाल रद्द झाल्याने अनेक तरुणांमध्ये नाराजी पसरली आहे. काही उमेदवारांनी  कागदपत्र अपलोड करण्यातील तांत्रिक समस्या सर्व्हर डाऊनची तक्रार मेल किंवा एसएमएस वेळेवर न मिळाल्याची कारणे दिली आहे. म्हणून परिषदेकडे पुनर्विचाराची मागणी केली असली, तरी परिषदेनं “कोणतीही विनंती मान्य करणार नाही” अशी कडक भूमिका घेतली आहे.

    शिक्षक भरती प्रक्रियेवर परिणाम
    या निर्णयामुळे पुढील शिक्षक भरती फेरीत 2207 उमेदवार वगळले जातील.पात्र उमेदवारांसाठी रिक्त पदांची संख्या वाढू शकते.

    पारदर्शकता आणि निकोप भरती प्रक्रियेस गती मिळणार आहे.