नवी दिल्ली/मुंबई. दिवाळीच्या उत्साहादरम्यान देशाच्या वेगवेगळ्या राज्यांतून आगीच्या हृदयद्रावक घटना समोर आल्या आहेत. फटाक्यांची ठिणगी आणि शॉर्ट सर्किटसारख्या कारणांमुळे भडकलेल्या आगीने अनेक कुटुंबांच्या आनंदावर दुःखाचे विजदन घातले आहे.

या अपघातांमध्ये 22 लोकांचा मृत्यू झाला, तर अनेक लोक गंभीर जखमी झाले आहेत आणि काही बेपत्ता असल्याचे सांगितले जात आहे. मदत आणि बचाव पथके रात्रभर वेगवेगळ्या भागांत ज्वाळांवर नियंत्रण मिळवण्यासाठी आणि लोकांना सुरक्षित बाहेर काढण्याच्या प्रयत्नात गुंतलेली राहिली.

मध्य प्रदेशात 12 जणांचा मृत्यू, एकाच कुटुंबातील 6 लोकांचा समावेश - 

अपघातांचा सर्वात तीव्र परिणाम मध्य प्रदेशात पाहायला मिळाला, जिथे दोन वेगवेगळ्या जिल्ह्यांत 12 लोकांचा जीव गेला. कटनी जिल्ह्यात एका निवासी घरात भीषण आग लागल्यामुळे एकाच कुटुंबातील सहा सदस्यांचा श्वास गुदमरल्याने आणि भाजल्याने मृत्यू झाला, ज्यामध्ये एका दोन महिन्यांच्या नवजातासह तीन निष्पाप बालकांचा समावेश होता.

तेथेच, सिवनी जिल्ह्यात एका सराफा व्यापाऱ्याच्या घरात पसरलेल्या आगीने एका १६ वर्षीय किशोरासह कुटुंबातील सहा लोकांना आपल्या विळख्यात घेतले. राज्यातील एकूण मृतांमध्ये पाच महिला, तीन पुरुष आणि चार बालकांचा समावेश आहे.

धाराशिवमध्ये एकाच कुटूंबातील 6 जण होरपळले -

    महाराष्ट्रात दुकाने आणि इमारतींमध्ये भडकल्या ज्वाळा महाराष्ट्रातही अनेक ठिकाणांवरून आगीच्या भयावह घटना समोर आल्या, जिथे धाराशिव जिल्ह्यात एका किराणा दुकानाच्या वर बनलेल्या घरात आग लागल्याने एकाच कुटुंबातील सहा लोक जिवंत जळाले. पुण्यात रात्रभरात आग लागण्याच्या 63 घटना समोर आल्या.

    मुंबईच्या लोखंडवालामध्ये झालेल्या आणखी एका अपघातातही एका व्यक्तीचा जीव गेला, तर डोंगरी भागात झोपड्या आणि दुकानांना आगीने आपल्या कवेत घेतले.

    याव्यतिरिक्त नागपूरच्या एका टीव्हीएस शोरूममध्ये अनेक गाड्या जळून खाक झाल्या आणि ठाण्याच्या एका 17 मजली इमारतीलाही आग लागली, तथापि सुदैवाने तिथे कोणतीही जीवितहानी झाली नाही.

    राजस्थानमध्ये फटाक्यांचे दुकान खाक -

    राजस्थानच्या पाली जिल्ह्यात फटाक्यांच्या एका दुकानात अचानक आग भडकल्याने दोन लोकांचा मृत्यू झाला आणि तीन लोक बेपत्ता झाले. या अपघाताच्या ज्वाळांनी आसपासची तीन दुकाने आणि अनेक दुचाकी वाहनांनाही पूर्णपणे जाळून खाक केले.

    दिल्लीत चिमुरड्याचा मृत्यू -

    राजधानी दिल्लीच्या नरेला भागात आतषबाजीदरम्यान सुटलेला रॉकेट फटाका थेट 10 वर्षांच्या एका बालकाच्या पोटात जाऊन घुसला, ज्यामुळे गंभीर दुखापत झाल्यामुळे घटनास्थळीच त्याचा मृत्यू झाला.

    यूपीमध्येही आगीचा कहर -

    उत्तर प्रदेशच्या बांदामध्ये एका भंगाराच्या गोदामात आग लागल्याने सुमारे 10 ते 25 लाख रुपयांची मालमत्ता जळाली. गाझियाबादच्या क्रॉसिंग रिपब्लिक भागातूनही आग लागल्याची माहिती मिळाली आहे.

    देशाच्या उर्वरित भागांतही आगीमुळे मोठ्या प्रमाणावर आर्थिक नुकसान नोंदवले गेले. जम्मूच्या नेहरू मार्केटमध्ये 12 हून अधिक दुकाने खाक झाली. आसामच्या जोनाई, सिक्कीमच्या गंगटोक येथूनही आग लागल्याची माहिती मिळाली, जिथे अग्निशमन दलाच्या जवानांनी कठोर परिश्रमानंतर परिस्थितीवर नियंत्रण मिळवले.

    मुंबईतील विद्याविहार येथील 10 मजली इमारतीला आग -

    रविवारी, 8 नोव्हेंबरच्या रात्री उशिरा विद्याविहार येथील 10 मजली व्यावसायिक इमारतीत 'लेव्हल-२' (Level-II) दर्जाची आग लागली. जॉली जिमखाना परिसरातील 'स्कायलाईन विडा' (Skyline Vida) या इमारतीत रात्री 11:56 वाजण्याच्या सुमारास ही आग लागली. 

    मुंबई अग्निशमन दलाच्या माहितीनुसार, ही आग इमारतीच्या सातव्या, आठव्या, नवव्या आणि दहाव्या मजल्यापुरती मर्यादित होती.  ही घटना घडल्यानंतर, आग विझवण्यासाठी आणि आपत्कालीन मदतकार्य करण्यासाठी मुंबई अग्निशमन दल, पोलीस, अदानी कंपनीचे अधिकारी, 108 रुग्णवाहिका पथक आणि महानगरपालिकेच्या वॉर्डमधील कर्मचारी घटनास्थळी दाखल झाले.

    मुंबईतील डोंगरी येथील हाजी कासम चाळमध्ये भीषण आग -

    मुंबईतील डोंगरी भागात असलेल्या डॉ. माहेश्वरी रोडवरील 'हाजी कासम चाळ'मध्ये रविवारी रात्री भीषण आग लागली. घटनेची माहिती मिळताच आपत्कालीन पथकांना तातडीने घटनास्थळी रवाना करण्यात आले, अशी माहिती अधिकाऱ्यांनी दिली. ही आग सर्वप्रथम चाळीतील दत्त मंदिराच्या जवळ असलेल्या एका गॅरेजमध्ये लागल्याचे समजले. मुंबई अग्निशमन दलाने रात्री 9.58 वाजता या आगीला 'लेव्हल-1' (Level-I) श्रेणीतील आग म्हणून घोषित केले होते, त्यानंतर रात्री 10:10 वाजता तिची तीव्रता वाढल्याने तिला 'लेव्हल-2' (Level-II) श्रेणीत रूपांतरित करण्यात आले. यामध्ये कोणीही जखमी झाल्याचे वृत्त नाही.

    अंधेरी पश्चिमेकडील बहुमजली इमारतीच्या 15  व्या मजल्यावर आग -

    मुंबईतील अंधेरी पश्चिम भागात, लोखंडवाला पुलाजवळ असलेल्या 'रुनवाल टॉवर' (जी+32 मजली इमारत) या गगनचुंबी इमारतीच्या 15 व्या मजल्यावरील एका खोलीत शनिवारी रात्री आग लागली.

    प्राथमिक माहितीनुसार, रात्री 9:50 वाजता मुंबई अग्निशमन दलाला (MFB) या घटनेची सूचना मिळाली. त्यानंतर अग्निशमन दलाचे जवान, पोलीस, अदानी इलेक्ट्रिसिटीचे कर्मचारी, 108 रुग्णवाहिका आणि महानगरपालिका वॉर्डचे कर्मचारी तातडीने घटनास्थळी दाखल झाले.