मुंबई. महाराष्ट्राच्या राजकारणात पुन्हा एकदा मोठी उलथापालथ होण्याची शक्यता व्यक्त केली जात आहे. उद्धव ठाकरे यांच्या नेतृत्वाखालील शिवसेनेतील सहा खासदारांनी लोकसभा अध्यक्षांकडे एक महत्त्वाचे पत्र सादर केल्याची माहिती समोर आली आहे. या पत्रात उद्धव ठाकरे यांची शिवसेना काँग्रेसमध्ये विलीन करण्याचे प्रयत्न सुरू असल्याची भीती व्यक्त करण्यात आल्याचे सांगितले जात आहे.
माहितीनुसार, हे पत्र सुमारे 48 तासांपूर्वी लोकसभा अध्यक्षांकडे जमा करण्यात आले होते. मात्र, याबाबतची माहिती तत्काळ सार्वजनिक करण्यात आली नाही. त्यामुळे या घडामोडींमागे नेमकी कोणती राजकीय रणनीती आहे, याबाबत विविध तर्कवितर्कांना उधाण आले आहे.
माहितीनुसार, शिवसेनेच्या वर्धापन दिनानिमित्त 20 जून रोजी या विषयाबाबत मोठी घोषणा होऊ शकते. उपमुख्यमंत्री एकनाथ शिंदे यांच्या नेतृत्वाखालील शिवसेनेकडून या घडामोडींचा अधिकृत खुलासा केला जाऊ शकतो, अशी माहिती मिळत आहे.
20 जून रोजी संसदेकडून एक अधिकृत बुलेटिन जारी होण्याची शक्यता आहे. या बुलेटिनमध्ये ठाकरे गटातील सहा खासदारांचे शिंदे यांच्या शिवसेनेमध्ये विलिनीकरण झाल्याची नोंद करण्यात येऊ शकते. त्यामुळे राज्याच्या तसेच राष्ट्रीय राजकारणात याचे दूरगामी परिणाम होण्याची शक्यता वर्तवली जात आहे.
दरम्यान, या प्रक्रियेदरम्यान लोकसभा अध्यक्ष ठाकरे गटाच्या नेत्यांना चर्चेसाठी बोलावू शकतात. संबंधित खासदारांचे म्हणणे, पक्षाची भूमिका आणि घटनात्मक बाबी यांचा विचार करूनच पुढील निर्णय घेतला जाऊ शकतो. मात्र, या संपूर्ण प्रकरणात अंतिम निर्णय घेण्याचा अधिकार लोकसभा अध्यक्षांकडेच आहे अशी माहिती घटना तज्ञांनी दिली आहे.
या संभाव्य घडामोडींमुळे ठाकरे गट आणि शिंदे गटातील राजकीय संघर्ष आणखी तीव्र होण्याची चिन्हे दिसत आहेत. 20 जून रोजी होणाऱ्या संभाव्य घोषणेकडे राज्याच्या राजकीय वर्तुळाचे लक्ष लागले असून, त्यातून शिवसेनेच्या भविष्यातील राजकीय दिशेबाबत महत्त्वाचे संकेत मिळण्याची शक्यता आहे.
