जेएनएन, मुंबई: पार्थ पवार यांच्या अमेडिया कंपनीला (Amedia company) नोंदणी आणि मुद्रांक विभागाने दिलेल्या तब्बल 42 कोटी रुपयांच्या मुद्रांक शुल्क नोटीशी संदर्भात कंपनीने उत्तर सादर करण्यासाठी पुन्हा एकदा अतिरिक्त मुदतवाढ मागितली आहे. या नोटीशीला उत्तर देण्यासाठी देण्यात आलेली 24 नोव्हेंबरची अंतिम मुदत काल संपली. मात्र, वेळेत उत्तर देता न आल्याने अमेडियाच्या वकिलांनी नवा अर्ज दाखल करत आणखी 15 दिवसांची मुदतवाढ मागितली आहे.
अंतिम संधी दिल्याची जोरदार चर्चा
यापूर्वीही कंपनीने वेळ मागितल्याने विभागाकडून त्यांना मुदतवाढ दिली होती. मात्र, कालावधी संपताच पुन्हा एकदा कंपनीने विस्तारित मुदतीची मागणी केली आहे. नव्या अर्जावर विभागाने अद्याप निर्णय जाहीर केलेला नसला तरी, माहितीनुसार अमेडियाला पुन्हा उत्तर सादर करण्याची अंतिम संधी दिल्याची जोरदार चर्चा सुरू आहे.
मुद्रांक शुल्क कमी दाखवल्याचा आरोप
या प्रकरणात अमेडिया कंपनीवर मोठ्या आर्थिक व्यवहारात मुद्रांक शुल्क कमी दाखवल्याचा आरोप आहे. त्यावर विभागाने स्पष्टीकरण मागितले होते. मात्र, कंपनीकडून आवश्यक कागदपत्रे आणि दावे वेळेत सादर न झाल्याने नोटीशीवरील कार्यवाही लांबणीवर पडत आहे. या विलंबामुळे विभागातील अधिकाऱ्यांमध्येही नाराजी व्यक्त होत असल्याची माहिती समोर आली आहे.
विभाग अंतिम निर्णय देण्याची शक्यता
पुढील काही दिवसांत विभाग अंतिम निर्णय देण्याची शक्यता असून, कंपनीने मागितलेली मुदतवाढ मंजूर झाल्यास अमेडियाला आपले म्हणणे मांडण्यासाठी आणखी वेळ मिळेल. तर, मुदतवाढ नाकारल्यास नोटीशीवरील पुढील कारवाईला वेग येऊ शकतो. एकूणच 42 कोटींच्या या प्रकरणावर सर्वांचे लक्ष केंद्रीत झाले आहे. तर पार्थ पवार यांची अडचण ही वाढणार असल्याची जोरदार चर्चा सुरू झाली आहे.