जेएनएन, मुंबई. Narendra Modi: शिवसेना उद्धव ठाकरे गटाचे नेते संजय राऊत यांनी पंतप्रधान नरेंद्र मोदींचे उत्तराधिकारी मुख्यमंत्री देवेंद्र फडणवीस राहतील, असे सूचक वक्तव्य केले होते. यावर नागपुरात पत्रकारांशी संवाद साधताना खुद्द देवेंद्र फडणवीस यांनी उत्तर दिली आहे. पंतप्रधान नरेंद्र मोदी हे स्वतः सक्षम असून त्यांचा उत्तराधिकारी शोधण्याची कुठलीही गरज नाही. 2029 मध्ये देश पुन्हा त्यांनाच पंतप्रधान म्हणून पाहण्यास इच्छुक आहे, असं फडणवीस म्हणाले.
पंतप्रधान पदाचा नवा चेहरा शोधणार का?
पंतप्रधान नरेंद्र मोदी हे आता 75 वर्षांचे आहेत. तर 2029 पर्यंत ते 78 वर्षांचे होणार आहेत. वयाची 75 वर्ष पूर्ण झाल्यावर राजकारणातून दूर व्हावे आणि नव्या पिढीला संधी द्यावी असे फर्मान पंतप्रधान नरेंद्र मोदी यांनीच काही वर्षांपूर्वी काढले होते. त्यामुळे आता हा नियम त्यांनाही लागू होऊन 2029 साठी भाजप पंतप्रधान पदाचा नवा चेहरा शोधणार का? असा प्रश्न उपस्थित केला जात आहे, असं काही दिवसांपूर्वी संजय राऊत यांनी म्हटलं होतं. त्यावर फडणवीसांनी उत्तर दिलं आहे.
ही आपल्या देशाची परंपरा नाही
नेता सक्रिय असताना उत्तराधिकाराची चर्चा करणे भारतीय संस्कृतीत अयोग्य आहे, पंतप्रधान नरेंद्र मोदी हे स्वतः सक्षम आहेत. त्यांना कुठल्याही पद्धतीची अडचण नाही. त्यामुळे मोदींचा उत्तराधिकारी शोधण्याची कुठलीही गरज नाही. ते अजून बरेच वर्ष काम करू शकतात. 2029 मध्ये पंतप्रधान म्हणून देश मोदींकडे पाहत आहे. वडील जिवंत असताना त्यांचा वारसदार शोधणे ही आमच्या देशाची परंपरा नाही. ही मुघली संस्कृती आहे आणि तसाही उत्तराधिकारी याच्याशी माझा कुठलाही संबंध नाही, असं फडणवीस म्हणाले.