एजन्सी, मुंबई: मुंबईतील विले पार्ले परिसरातील 12 मजली निवासी इमारतीला आग लागल्याने एक लहान मुलगा आणि एका महिलेचा मृत्यू झाला, तर सहा जण जखमी झाले, अशी माहिती पालिकेच्या अधिकाऱ्यांनी बुधवारी दिली.
मंगळवारी रात्री सुमारे 10 वाजता शांता भवन इमारतीच्या 11 व्या मजल्यावरील दोन फ्लॅटमध्ये आग लागली.
दोन घरांमध्ये सुमारे 4000 चौरस फूट परिसरातील विद्युत वायरिंग आणि उपकरणे, एक एसी युनिट आणि इतर घरगुती वस्तूंना आग लागली, असे अधिकाऱ्यांनी सांगितले.
दोन अग्निशमन दलाच्या जवानांसह आठ जण जखमी झाले असून, त्यांना दोन रुग्णालयांमध्ये दाखल करण्यात आले आहे.
अबीर नावाच्या अडीच वर्षांच्या मुलाला आणि अंकिता (23) नावाच्या महिलेला नानावटी रुग्णालयात मृत घोषित करण्यात आले, अशी माहिती एका पालिका अधिकाऱ्याने दिली.
इतर चार जखमींवरही रुग्णालयात उपचार करण्यात आले आणि त्यापैकी दोघांना नंतर घरी सोडण्यात आले. इतर दोघांची प्रकृती स्थिर असल्याचे सांगण्यात आले.
जखमी झालेले दोन अग्निशमन कर्मचारी - मनोज सोनावणे (30) आणि शिवम द्विवेदी (29) यांना उपचारासाठी जवळच्या कूपर रुग्णालयात दाखल करण्यात आले होते आणि नंतर त्यांना डिस्चार्ज देण्यात आला, असे अधिकाऱ्यांनी सांगितले.
घटनेनंतर अग्निशमन दलाचे जवान घटनास्थळी दाखल झाले आणि बुधवारी पहाटे 1 वाजेपर्यंत आग विझवण्यात आली, असे त्यांनी सांगितले.
आगीच्या कारणाचा तपास सुरू असल्याचे त्यांनी सांगितले.
