मुंबई. मुंबईकरांची जीवनवाहिनी असलेल्या लोकल रेल्वेतील प्रवाशांच्या सुरक्षेला प्राधान्य देत मुंबई रेल्वे पोलिसांनी महत्त्वाचा निर्णय घेतला आहे. यापुढे लोकलमधून प्रवास करताना धारदार हत्यारे किंवा धारदार अवजारे सोबत नेण्यावर निर्बंध घालण्यात आले असून, कामासाठी अशी अवजारे वापरणाऱ्या नागरिकांनी ती शक्यतो कामाच्या ठिकाणीच ठेवावीत, असे आवाहन रेल्वे पोलिसांनी केले आहे.
रेल्वे पोलिसांनुसार, दररोज लाखो प्रवासी मुंबई लोकलमधून प्रवास करतात. गर्दीच्या वेळी धारदार वस्तूंमुळे अपघात होण्याची किंवा त्यांचा गैरवापर होण्याची शक्यता नाकारता येत नाही. त्यामुळे प्रवाशांच्या सुरक्षिततेच्या दृष्टीने हा निर्णय घेण्यात आला आहे.
कोणत्या व्यावसायिकांना होणार परिणाम?
मासळी विक्रेते, बिगारी कामगार, सुतार, लोहार, बांधकाम क्षेत्रातील कामगार तसेच कामासाठी चाकू, कोयता, कटर, धारदार साधने किंवा इतर अवजारे वापरणाऱ्या अनेक व्यावसायिकांकडे अशी साधने असतात. मात्र, ही अवजारे लोकल प्रवासादरम्यान सोबत न आणता कामाच्या ठिकाणीच ठेवण्याचे आवाहन पोलिसांनी केले आहे.
रेल्वे पोलिसांनी स्पष्ट केले आहे की, हा निर्णय कोणत्याही विशिष्ट व्यवसायाला लक्ष्य करण्यासाठी नसून, लोकलमधील सर्व प्रवाशांच्या सुरक्षेच्या दृष्टीने प्रतिबंधात्मक उपाय म्हणून घेण्यात आला आहे.
वैद्यकीय विद्यार्थ्यांसाठी सवलतीचा विचार-
वैद्यकीय शिक्षण घेणाऱ्या विद्यार्थ्यांना अभ्यासासाठी शस्त्रक्रियेसाठी वापरली जाणारी काही धारदार उपकरणे किंवा डिसेक्शन किट सोबत बाळगावी लागतात. अशा विद्यार्थ्यांना आवश्यकतेनुसार आणि योग्य ओळखपत्राच्या आधारे काही प्रमाणात सवलत देण्यात येणार आहे. याबाबत रेल्वे पोलीस आणि संबंधित यंत्रणा विचार करत आहेत.
सुरक्षेला सर्वोच्च प्राधान्य
मुंबई लोकलमध्ये वाढती गर्दी, प्रवाशांमधील वाद आणि सुरक्षेच्या घटना लक्षात घेऊन रेल्वे पोलीस सातत्याने विविध उपाययोजना करत आहेत. धारदार अवजारे किंवा हत्यारे लोकलमध्ये नेण्यावर निर्बंध घालण्याचा निर्णयही त्याचाच एक भाग असल्याचे अधिकाऱ्यांनी सांगितले.
रेल्वे पोलिसांनी प्रवाशांना नियमांचे पालन करण्याचे आवाहन केले असून, संशयास्पद वस्तू किंवा व्यक्ती आढळल्यास तातडीने रेल्वे पोलीस किंवा रेल्वे सुरक्षा दलाला माहिती देण्याचेही आवाहन केले आहे. प्रवाशांच्या सुरक्षित आणि निर्भय प्रवासासाठी सर्वांनी सहकार्य करावे, असेही रेल्वे पोलिसांनी म्हटले आहे.
