मुंबई l Mumbai Water Supply : मुंबई महापालिकेच्या जलपुरवठा विभागाने दिलेल्या माहितीनुसार, 3 डिसेंबर रोजी सकाळी 10 वाजल्यापासून 4 डिसेंबर सकाळी 10 वाजेपर्यंत संपूर्ण 24 तास पाणीपुरवठा कमी दाबाने किंवा ठिकठिकाणी पूर्णपणे बंद राहणार आहे. जलवाहिन्यांची तपासणी, गळती नियंत्रण, मुख्य जलवाहिन्यांवरील दुरुस्ती आणि पंपिंग स्टेशनच्या देखभालीचे अत्यावश्यक काम हाती घेण्यात आले आहे. ही कामे तातडीची आणि महत्त्वाची असल्याने पाणीपुरवठा थांबवणे गरजेचे असल्याचे प्रशासनाने स्पष्ट केले आहे.
यंदाच्या मुसळधार पावसामुळे धरणांमध्ये पुरेसा साठा असला तरी, शहरातील पाणीपुरवठा व्यवस्था अत्यंत गुंतागुंतीची आणि जुनाट असल्यामुळे वेळोवेळी मोठ्या दुरुस्त्या आवश्यक होतात. अनेक ठिकाणी पाईपलाईनमध्ये गळती, दाबातील चढउतार आणि वाहिनी बदलण्याची गरज असल्याने नियोजित पाणीकपात करावी लागत असल्याचेही अधिकाऱ्यांकडून सांगण्यात आले.
दरम्यान, महापालिकेने नागरिकांना विनंती केली आहे की पाणीकपातीच्या काळात आवश्यक साठा करून पाणी जपून वापरावे, तसेच अनावश्यक पाणी वापर टाळावा. हॉस्पिटल्स, शाळा आणि आवश्यक सेवांना आधीच सूचना देऊन पर्यायी व्यवस्था करण्यात आल्याचेही प्रशासनाने सांगितले.
तात्पुरत्या गैरसोयीबद्दल प्रशासनाने खेद व्यक्त करत ही कामं पूर्ण झाल्यानंतर पाणीपुरवठा सुरळीत होईल अशी माहिती पाणी पुरवठा अधिकारी यांनी दिली आहे.