मुंबई. Maharashtra Weather Update Today : भारतीय हवामान विभागाने (IMD) मुंबई शहर जिल्ह्यातील मच्छिमारांना पुढील पाच दिवसांसाठी अत्यंत महत्त्वपूर्ण सूचना जारी केली आहे. 26 ते 30 नोव्हेंबर 2025 या कालावधीत दक्षिण अरबी समुद्र आणि आसपासच्या समुद्रक्षेत्रात हवामान प्रतिकूल राहणार असल्याचा अंदाज वर्तविण्यात आला आहे. विशेषतः केरळ किनारपट्टी, लक्षद्वीप, मालदीव परिसर, कोमोरिन क्षेत्र आणि मन्नारचे आखात या भागात वाऱ्याचा वेग मोठ्या प्रमाणात वाढणार असल्याचे IMD ने स्पष्ट केले आहे.
हवामान खात्याच्या माहितीनुसार, या कालावधीत समुद्रात 35 ते 55 किलोमीटर प्रतितास वेगाचे जोरदार वारे वाहण्याची शक्यता आहे. काही ठिकाणी हा वेग 65 किलोमीटर प्रतितासपर्यंत जाण्याची शक्यता वर्तविण्यात आली आहे. वाऱ्याचा वेग वाढल्याने समुद्रात उंच लाटा निर्माण होऊ शकतात, समुद्र खवळलेला राहू शकतो आणि मासेमारी नौकांना धोका निर्माण होऊ शकतो, असा इशाराही विभागाने दिला आहे.
या प्रतिकूल परिस्थितीच्या पार्श्वभूमीवर मुंबईतील सर्व किनारपट्टी भागातील मच्छिमारांना पुढील पाच दिवस समुद्रात न उतरण्याचे स्पष्ट निर्देश देण्यात आले आहेत. आधीच समुद्रात गेलेल्या नौकांनी सुरक्षित बंदरात परत यावे, तसेच हवामान विभागाने जारी केलेले नियमित अपडेट्स तपासत राहावे, असे आवाहन करण्यात आले आहे.
मच्छिमारांनी सुरक्षिततेस प्राधान्य देणे अत्यावश्यक असल्याचे हवामान विभागाने नमूद केले आहे. बदलत्या हवामानामुळे समुद्रातील परिस्थिती अचानक बदलू शकते, त्यामुळे सतर्कता आणि सावधगिरी हा सर्वोत्तम पर्याय असल्याचेही IMD ने सांगितले. स्थानिक प्रशासनानेही किनारी भागात सूचना प्रसारित करण्यास सुरुवात केली आहे.मच्छिमार बांधवांनी अधिकृत मार्गदर्शनाचे काटेकोरपणे पालन करावे, असे आवाहन केले आहे.