एजन्सी, मुंबई. Elphinstone Road Over Bridge Closed: मुंबईतील पूर्व-पश्चिम जोडणीमधील महत्त्वाचा पूल असलेला, शंभर वर्षे जुना एल्फिन्स्टन रोड ओव्हर ब्रिज (आरओबी) पुनर्बांधणीच्या कामासाठी गुरुवारपासून दोन वर्षांसाठी वाहतुकीसाठी बंद करण्यात येणार आहे, असे अधिकाऱ्यांनी बुधवारी सांगितले.

पुल पुनर्बांधणी करण्यासाठी बंद 

मध्य मुंबईतील परळ आणि प्रभादेवी भागांना जोडणारा हा एल्फिन्स्टन रोड ओव्हर ब्रिज, मुंबई महानगर प्रदेश विकास प्राधिकरणाच्या (एमएमआरडीए) शिवडी-वरळी उन्नत कनेक्टर प्रकल्पाचा भाग म्हणून पाडून पुनर्बांधणी करण्यासाठी बंद केला जाईल.यामुळे विशेषतः मध्य मुंबईतील दादर, लोअर परळ, करी रोड आणि भारतमाता या भागात वाहतूक कोंडी आणि व्यत्यय निर्माण होण्याची शक्यता आहे.

वाहतूक व्यवस्थेबाबत जनतेकडून हरकती मागवल्या

मुंबई वाहतूक पोलिसांनी मंगळवारी एक अधिसूचना जारी केली आणि पूर्व-पश्चिम जोडणी बंद झाल्यानंतर वाहतूक व्यवस्थेबाबत जनतेकडून हरकती मागवल्या. 13 एप्रिलपर्यंत या सूचना स्वीकारल्या जातील. पाडण्यात येणारा सध्याचा एल्फिन्स्टन पूल 13 मीटर रुंद आहे आणि सध्या प्रत्येक दिशेला फक्त 1.5 लेनच्या वाहतुकीची सोय आहे.

    100 वर्षांहून अधिक जुना ब्रिज 

    एमएमआरडीए अधिकाऱ्यांच्या म्हणण्यानुसार, 100 वर्षांहून अधिक जुना एल्फिन्स्टन रोड ओव्हर ब्रिज पाडणे हे वेळेवर पूर्ण करण्याचे काम आहे, जे पावसाळा सुरू होण्यापूर्वी पूर्ण करण्याची त्यांची योजना आहे. त्याच्या पाडकामानंतर आधुनिक दुमजली संरचना तयार होईल, ज्यामुळे शहरातील पूर्व-पश्चिम जोडणीमध्ये लक्षणीय सुधारणा होईल, अशी अपेक्षा आहे.

    नवीन दुमजली पुलाच्या पहिल्या स्तरावर डॉ. बाबासाहेब आंबेडकर रोड आणि सेनापती बापट रोड दरम्यान वाहतुकीसाठी 2+2 लेनचा मार्ग असेल, तर दुसस्तऱ्या रावर मुंबई ट्रान्स हार्बर लिंक (एमटीएचएल, ज्याला अटल सेतू म्हणूनही ओळखले जाते) ते वांद्रे-वरळी सी लिंक (बीडब्ल्यूएसएल) कडे जाणाऱ्या वाहतुकीसाठी 2+2 लेनचा मार्ग असेल.

    शिवडी-वरळी उन्नत कनेक्टर 4.5 किमी लांबीचा असेल आणि त्यात चार लेन (2+2) मार्ग असतील. तो एमटीएचएलला बीडब्ल्यूएसएलशी जोडेल, जो पश्चिम किनारपट्टीवरील शहराच्या उत्तर आणि दक्षिण किनारपट्टीच्या रस्त्यांना जोडणारा महत्त्वाचा दुवा आहे, असे अधिकाऱ्यांनी सांगितले.

    "हा मार्ग अटल सेतूला वांद्रे-वरळी सी लिंक आणि मुंबई कोस्टल रोडशी अखंडपणे जोडतो, ज्यामुळे प्रवासाचा वेळ लक्षणीयरीत्या कमी होतो आणि शेजारील नवी मुंबईतील प्रवाशांना मध्य आणि दक्षिण मुंबईत सिग्नल-मुक्त प्रवेश मिळतो," असे एमएमआरडीए अधिकाऱ्याने सांगितले.