एजन्सी, मुंबई. Mumbai Police Drug Seized: मुंबईतील एका घरातून 50 कोटी रुपयांचे ड्रग्ज जप्त केल्यानंतर महाराष्ट्रातील रायगड जिल्ह्यात मेफेड्रोन (एमडी) बनवणाऱ्या एका गुप्त प्रयोगशाळेचा पर्दाफाश केला आहे, अशी माहिती नार्कोटिक्स कंट्रोल ब्युरो (एनसीबी) ने दिली आहे. या प्रकरणी दोन पुरुषांना अटक करण्यात आली आहे, ज्यात या सिंथेटिक ड्रग्सचा निर्माताही आहे, असे अधिकाऱ्यांनी सांगितले.
आरोपी जामिनावर होता बाहेर
या दोन आरोपींपैकी ड्रग्ज पुरवठादारावर महसूल गुप्तचर संचालनालयाने (डीआरआय) अंमली पदार्थ आणि सायकोट्रॉपिक पदार्थ (एनडीपीएस) कायद्यांतर्गत यापूर्वी दोन गुन्हे दाखल केले आहेत. तो जामिनावर बाहेर होता आणि मेफेड्रोन (एमडी) उत्पादन टोळीमध्ये सामील होता, असे एका अधिकाऱ्याने सांगितले.
हेही वाचा - Maharashtra Budget Session 2025: भारतीय संविधान हे शतकानुशतके देशाला मार्ग दाखविणार - एकनाथ शिंदे
भांडुपमधून घेतले ताब्यात
मिळालेल्या विशिष्ट माहितीच्या आधारे, एनसीबीच्या अधिकाऱ्यांनी शनिवारी मुंबईतील भांडुप भागातील एका घरातून 46.8 किलो मेफेड्रोन (एमडी) जप्त करून दोघांना अटक केली, असे त्यांनी सांगितले. अधिकाऱ्याने सांगितले की, हे ड्रग्ज त्यापैकी एकाच्या घरी प्लास्टिकच्या कंटेनरमध्ये लपवून ठेवले होते.
रायगडमध्ये कारखाना
तपासादरम्यान, अटक करण्यात आलेल्या आरोपींपैकी एकाने शेजारच्या रायगड जिल्ह्यातील महाड औद्योगिक क्षेत्रातील एका प्रयोगशाळेत हे ड्रग्ज तयार केले, हे उघडकीस आले, असे त्यांनी सांगितले. एनसीबीच्या पथकाने त्यानंतर प्रयोगशाळेवर छापा टाकला आणि मोठ्या प्रमाणात ड्रग्ज बनवण्यासाठी वापरलेली रसायने जप्त केली, असे त्यांनी सांगितले. एनसीबीच्या अधिकाऱ्यांनी प्रयोगशाळा सील केली आहे, असे अधिकाऱ्याने सांगितले. या प्रकरणाचा पुढील तपास सुरू आहे, असेही त्यांनी सांगितले.