जेएनएन, मुंबई. Maharashtra Weather Update News: महाराष्ट्रासह देशातील अनेक भागांमध्ये मान्सूनच्या प्रतीक्षेत असलेल्या नागरिकांची चिंता वाढत आहे. आकाशात ढगांची वर्दळ असूनही अपेक्षित पाऊस होत नसल्याने उकाडा आणि दमट वातावरणाचा त्रास कायम आहे. भारतीय हवामान विभागाच्या (IMD) अंदाजानुसार पुढील काही दिवसांत तापमानात पुन्हा वाढ होण्याची शक्यता असून अनेक भागांमध्ये कमाल तापमान 4 ते 6 अंशांनी वाढू शकते.
मुंबई-कोकणात मान्सूनचा वेग मंदावला
सामान्यतः ११ जूनपर्यंत मुंबईत दाखल होणारा नैऋत्य मान्सून यंदा अपेक्षेप्रमाणे पुढे सरकलेला नाही. हवामान विभागानुसार मान्सूनची प्रगती सध्या दक्षिण कोकण परिसरात मंदावली असून मुंबई, ठाणे आणि आसपासच्या भागांना अजून काही दिवस प्रतीक्षा करावी लागू शकते. यामुळे मुंबई ते गोवा किनारपट्टी भागात दमट उष्णतेचा प्रभाव वाढण्याची शक्यता आहे.
उष्णतेत पुन्हा वाढ होणार
पंजाब, हरियाणा, राजस्थान आणि दिल्लीसह उत्तर भारतातील अनेक राज्यांमध्ये तापमान ४० अंश सेल्सिअसच्या आसपास राहण्याचा अंदाज आहे. महाराष्ट्रातील काही अंतर्गत भाग, विशेषतः विदर्भ आणि खान्देशमध्येही उष्णतेचा जोर कायम राहू शकतो. हवामान विभागाने जून महिन्यात सरासरीपेक्षा अधिक उष्णतेच्या लाटांचा इशाराही दिला आहे.
विदर्भ मराठवाड्यात ‘संमिश्र’ हवामान
मराठवाडा, विदर्भ, मध्य प्रदेश आणि ओडिशामध्ये पुढील 24 ते 48 तासांत हवामानाचा रंग वारंवार बदलू शकतो. सकाळी कडक ऊन, दुपारी ढगांची गर्दी आणि संध्याकाळी मेघगर्जनेसह वादळी पावसाच्या सरी अशी परिस्थिती निर्माण होण्याची शक्यता हवामान तज्ज्ञांनी व्यक्त केली आहे. काही ठिकाणी विजांचा कडकडाट, सोसाट्याचा वारा आणि स्थानिक स्वरूपाचा पाऊसही पडू शकतो.
ईशान्य भारतात वादळाचा इशारा
पुढील 24 तासांत ईशान्य भारतातील आसाम, मेघालय, नागालँड, मणिपूर, मिझोराम आणि त्रिपुरा या राज्यांमध्ये वादळी पाऊस आणि मेघगर्जनेची शक्यता व्यक्त करण्यात आली आहे. काही भागांत जोरदार पावसामुळे स्थानिक अडचणी निर्माण होऊ शकतात.
मान्सून का अडकला?
हवामान तज्ज्ञांच्या मते, अरबी समुद्रातील अनुकूल वाऱ्यांचा अभाव, पश्चिमी विक्षोभांचा प्रभाव आणि एल निनोची वाढती तीव्रता यामुळे मान्सूनच्या प्रगतीचा वेग मंदावला आहे. देशातील मध्य आणि उत्तर भागात पुढील दोन आठवड्यांत सरासरीपेक्षा कमी पावसाची शक्यता वर्तवण्यात आली आहे.
शेतकऱ्यांसाठी सावधगिरीचा इशारा
मान्सूनची प्रगती संथ असल्यामुळे शेतकऱ्यांना घाईघाईने पेरणी न करण्याचा सल्ला देण्यात आला आहे. अनेक भागांत अद्याप व्यापक आणि सातत्यपूर्ण पावसाची परिस्थिती निर्माण झालेली नसल्याने पेरणीपूर्वी स्थानिक हवामान अंदाज तपासण्याचे आवाहन करण्यात आले आहे.
