जेएनएन, जालना. मराठा आरक्षणाच्या प्रश्नावर मनोज जरांगे पाटील यांनी पुन्हा एकदा आक्रमक भूमिका घेतली आहे. राज्यातील विविध भागांत मराठा आणि कुणबी समाजावर अन्याय होत असल्यास एकजुटीने आणि आक्रमकपणे आंदोलनात सहभागी व्हा, असे आवाहन जरांगे पाटील यांनी केले आहे. 29 ऑगस्ट रोजी अंतरवाली सराटी येथे उपोषण करण्याची घोषणा त्यांनी केली आहे. त्यामुळे आगामी काळात मराठा आरक्षणाचा मुद्दा पुन्हा राज्याच्या राजकारणाच्या केंद्रस्थानी येण्याची शक्यता आहे.
जरांगे पाटील म्हणाले की, “पश्चिम महाराष्ट्र, कोकण, मुंबई, खानदेश, विदर्भ, मराठवाडा जिथे जिथे मराठ्यांवर, कुणबीवर अन्याय होईल, त्यांनी एकजुटीने आणि आक्रमकपणे उठायचे आणि 29 ऑगस्टच्या अंतरवालीच्या आंदोलनाची तयारी करायची.” कोणाच्याही दबावाला बळी पडू नका, घाबरू नका आणि शांत बसू नका, तर आक्रमक व्हा, असे आवाहनही त्यांनी समाजाला केले.
20 ते 25 ऑगस्टदरम्यान विदर्भ-मराठवाडा दौरा
आगामी आंदोलनाच्या पार्श्वभूमीवर जरांगे पाटील यांनी आपल्या दौऱ्याचीही माहिती दिली. 20 ते 25 ऑगस्टदरम्यान विदर्भ आणि मराठवाड्यात दौरा करणार असल्याचे त्यांनी सांगितले. या दौऱ्यात मराठा समाजातील कार्यकर्ते, पदाधिकारी आणि नागरिकांशी संवाद साधून आगामी आंदोलनाबाबत भूमिका स्पष्ट केली जाण्याची शक्यता आहे.
29 ऑगस्टला उपोषण
जरांगे पाटील यांनी स्पष्टपणे सांगितले की, 29 ऑगस्ट रोजी उपोषण करण्यात येणार आहे. या आंदोलनाच्या तयारीसाठी राज्यभरातील समाजबांधवांनी एकत्र येण्याचे आवाहन त्यांनी केले आहे. “माझं समाजापुढे जे कर्तव्य होतं, ते मी पूर्ण केलं. राज्यातल्या सगळ्या अभ्यासकांना मी काल बोलावले होते. 29 ऑगस्टला उपोषण करायचे आहे. पुढचे जीआर कसे काढायचे, मागच्या जीआरमध्ये काय सुधारणा करायची का, काय-काय करायचं यावर मी माझे कर्तव्य पार पाडले.”
जीआरमधील सुधारणांवर चर्चा
मराठा आरक्षणाच्या अंमलबजावणीसाठी शासन निर्णयांमध्ये कोणत्या सुधारणा आवश्यक आहेत, पुढील जीआर कशा पद्धतीने काढण्यात यावेत आणि आधीच्या जीआरमध्ये काही बदल करण्याची आवश्यकता आहे का, याबाबत अभ्यासकांशी चर्चा झाल्याचे जरांगे पाटील यांनी सांगितले.आगामी आंदोलनामध्ये केवळ आरक्षणाच्या मागणीबरोबरच शासन निर्णय, त्यातील तरतुदी आणि त्यांची अंमलबजावणी हे मुद्देही केंद्रस्थानी राहण्याची शक्यता आहे.
राज्यभरातील मराठा समाजाला तयारीचे आवाहन
पश्चिम महाराष्ट्रापासून विदर्भ आणि मराठवाड्यापर्यंत राज्यातील विविध भागांमध्ये मराठा आरक्षणाचा मुद्दा पुन्हा चर्चेत आणण्याची तयारी जरांगे पाटील यांनी सुरू केली आहे. 20 ते 25 ऑगस्टदरम्यानचा दौरा आणि त्यानंतर 29 ऑगस्टचे अंतरवाली सराटीतील उपोषण यामुळे मराठा आंदोलनाच्या पुढील टप्प्याकडे राज्याचे लक्ष लागले आहे.
दरम्यान, “कुणाच्या दबावाला बळी पडू नका, घाबरू नका, शांत बसू नका,” असा स्पष्ट संदेश देत जरांगे पाटील यांनी समाजाला आगामी आंदोलनासाठी सज्ज राहण्याचे आवाहन केले आहे.
