धुळे. दुष्काळाच्या संकटाने आधीच हैराण झालेल्या शेतकऱ्यांच्या अडचणी आता बाजारभावाच्या प्रश्नामुळे आणखी वाढली आहेत. मोठ्या कष्टाने आणि वाढता खर्च करून पिकवलेल्या फळभाज्यांना अपेक्षित दर मिळत नसल्याने धुळे शहरालगतच्या वरखेडी शिवारात एका शेतकऱ्याने आपल्या उभ्या पिकात चक्क मेंढ्या सोडल्याची घटना समोर आली आहे. उत्पादनासाठी झालेला खर्चही भरून निघत नसल्याने या शेतकऱ्याने संताप व्यक्त करत सरकारने तातडीने हस्तक्षेप करून शेतकऱ्यांना दिलासा द्यावा, अशी मागणी केली आहे.
धुळे जिल्ह्यात यंदा पावसाच्या अनिश्चिततेचा आणि दुष्काळी परिस्थितीचा मोठा परिणाम शेतीवर झाला आहे. उपलब्ध पाण्यावर आणि मर्यादित साधनसामग्रीवर शेतकरी पालेभाज्या आणि फळभाज्यांची लागवड करत आहेत. पिकासाठी बियाणे, खते, औषधे, मजुरी, पाणी आणि वाहतूक यावर मोठा खर्च करावा लागत आहे. मात्र बाजारात माल दाखल झाल्यानंतर अपेक्षित दर मिळत नसल्याने शेतकऱ्यांसमोर उत्पादन खर्च वसूल करण्याचेही आव्हान निर्माण झाले आहे.
खर्च मोठा, मात्र बाजारभाव कमी
वरखेडी शिवारातील संबंधित शेतकऱ्यानेही मोठ्या अपेक्षेने फळभाजीचे पीक घेतले होते. मात्र पीक बाजारात आणण्याची वेळ आली असताना मिळणारा दर अत्यल्प असल्याचे त्याच्या निदर्शनास आले. बाजारभाव आणि उत्पादनासाठी झालेला खर्च यामध्ये मोठी तफावत असल्याने शेतकऱ्याला आर्थिक नुकसान सहन करण्याची वेळ आली.
माल तोडून बाजारात नेण्यासाठी लागणारी मजुरी, वाहतूक आणि इतर खर्च लक्षात घेतल्यास मिळणाऱ्या दरातून प्रत्यक्षात हातात काहीच शिल्लक राहत नसल्याची शेतकऱ्यांची व्यथा आहे. त्यामुळे पीक काढून विकण्यापेक्षा ते शेतातच सोडून देण्याची वेळ काही शेतकऱ्यांवर येत आहे.
निसर्गाची साथ नाही, बाजारभावाचाही आधार नाही
दुष्काळामुळे पाण्याची उपलब्धता कमी असताना शेतकऱ्यांनी उपलब्ध पाण्याचे नियोजन करून पिके उभी केली. मात्र पिकांना बाजारात योग्य भाव मिळत नसल्याने शेतकऱ्यांचे आर्थिक गणित कोलमडले आहे. एका बाजूला वाढता उत्पादन खर्च आणि दुसऱ्या बाजूला बाजारातील कमी दर, अशा दुहेरी कोंडीत शेतकरी सापडला आहे.
