बीड. Maharashtra Drought like situation: पावसाने दडी मारल्याने बीड जिल्ह्यातील अनेक भागांमध्ये दुष्काळसदृश परिस्थिती निर्माण झाली आहे. पावसाअभावी पिकांनी माना टाकल्या असून शेतजमिनींना भेगा पडल्या आहेत. खरीप हंगामातील पिकांचे मोठे नुकसान होण्याची शक्यता निर्माण झाली असतानाच आता शेतकऱ्यांसमोर आपल्या पशुधनाला वाचवण्याचे मोठे आव्हान उभे आहे. चारा आणि पाण्याचा प्रश्न गंभीर बनल्याने 50 गायींचे पालन कसे करायचे? असा सवाल टाकळसिंग येथील युवक शेतकरी कुंडलिक जगताप यांनी उपस्थित केला आहे.
पावसाची प्रतीक्षा लांबत चालल्याने ग्रामीण भागातील परिस्थिती दिवसेंदिवस बिकट होत आहे. शेतातील पिकांना पाण्याची गरज असताना पावसाचा पत्ता नाही. त्यामुळे अनेक ठिकाणी उभी पिके वाळू लागली आहेत. शेतकऱ्यांनी पीक वाचवण्यासाठी केलेला खर्चही आता वाया जाण्याची भीती आहे. या सगळ्या संकटाचा थेट परिणाम पशुधनावरही होत आहे.
टाकळसिंग येथील युवक शेतकरी कुंडलिक जगताप यांच्या पशुधनापुढेही सध्या चारा आणि पाण्याचे मोठे संकट निर्माण झाले आहे. त्यांच्या पशुधनात जवळपास ५० गायी आहेत. मात्र पाऊस नसल्याने शेतातून चारा उपलब्ध होत नाही. दुसरीकडे पाण्याचे स्रोतही आटत चालल्याने जनावरांना पाणी आणि चारा कुठून उपलब्ध करून द्यायचा, असा प्रश्न त्यांच्यासमोर निर्माण झाला आहे.
शेतातूनच कृषिमंत्र्यांना फोन
या गंभीर परिस्थितीत जगताप यांनी थेट कृषिमंत्री दत्ता भरणे यांना फोन केला. शेतातूनच त्यांनी कृषिमंत्र्यांशी संवाद साधत बीडमधील परिस्थिती आणि आपल्या पशुधनाची व्यथा मांडली. “चारा-पाणी नाही, 50 गायी कशा जगवायच्या?” असा सवाल त्यांनी कृषिमंत्र्यांसमोर उपस्थित केला.
पावसाअभावी शेती उद्ध्वस्त होण्याच्या मार्गावर असताना पशुधन वाचवणेही कठीण होत असल्याचे जगताप यांनी सांगितले. शेतकऱ्यांकडे जनावरांसाठी चारा खरेदी करण्याची क्षमता राहिलेली नाही. त्यामुळे शासनाने तातडीने चारा आणि पाण्याची व्यवस्था करावी, अशी मागणी त्यांनी केली.
दुष्काळ जाहीर करण्याची मागणी
दरम्यान, बीडसह राज्यातील अनेक भागांत अपुऱ्या पावसामुळे गंभीर परिस्थिती निर्माण झाल्याचा दावा शेतकरी आणि विरोधकांकडून केला जात आहे. अनेक भागांत पिकांचे नुकसान, पिण्याच्या पाण्याची टंचाई आणि पशुधनासाठी चाऱ्याचा प्रश्न निर्माण झाला आहे. त्यामुळे शासनाने परिस्थितीचे तातडीने सर्वेक्षण करून शेतकऱ्यांना मदत द्यावी, तसेच आवश्यक त्या भागात दुष्काळी उपाययोजना लागू कराव्यात, अशी मागणी जोर धरत आहे.
कृषिमंत्र्यांना केलेल्या या थेट फोनमुळे बीडच्या ग्रामीण भागातील दुष्काळाची आणि पशुधनाच्या चारा-पाण्याच्या संकटाची तीव्रता पुन्हा एकदा समोर आली आहे. आता शासनाकडून या परिस्थितीवर कोणत्या तातडीच्या उपाययोजना केल्या जातात, याकडे शेतकऱ्यांचे लक्ष लागले आहे.
