जेएनएन, मुंबई, Maharashtra Politics News: लातूर येथे राष्ट्रवादी युवकचे प्रदेशाध्यक्ष सूरज चव्हाण (Suraj Chavan) यांनी छावा संघटनेच्या प्रदेशाध्यक्षांना मारहाण केली. या मारहाणीचे राज्यभरात पडसाद उमटत आहेत. सुनील तटकरे यांना निवेदन देण्यासाठी गेलेल्या विजय घाडगे पाटील (Vijay Ghadge Patil) यांना सूरज चव्हाण यांनी बेदम मारहाण केली. या मारहाणीवर अजित पवार यांनी आपली पहिली प्रतिक्रिया दिली आहे. 

काल लातूरमध्ये घडलेल्या अत्यंत गंभीर आणि निषेधार्ह घटनेच्या पार्श्वभूमीवर, मी राष्ट्रवादी युवक काँग्रेसचे प्रदेशाध्यक्ष सूरज चव्हाण यांना त्यांच्या पदाचा त्वरित राजीनामा द्यायच्या स्पष्ट सूचना दिल्या आहेत, असं अजित पवार यांनी समाज माध्यमांवर पोस्ट करुन म्हटलं आहे.  

पक्षाच्या मूल्यांच्या विरोधात जाऊन केले जाणारे वर्तन कोणत्याही स्थितीत स्वीकारले जाणार नाही, यासाठी हा कठोर निर्णय घेतला आहे, असंही त्यांनी म्हटलं आहे. 

राष्ट्रवादी काँग्रेस आणि छावा संघटनेच्या पदाधिकाऱ्यांमध्ये घडलेली घटना निषेधार्ह

लातूरमध्ये राष्ट्रवादी काँग्रेस आणि छावा संघटनेच्या पदाधिकाऱ्यांमध्ये घडलेली घटना अत्यंत गंभीर, दुर्दैवी आणि निषेधार्ह आहे. कोणत्याही प्रकारच्या हिंसेला, असभ्य वर्तनाला किंवा असंसदीय भाषेला मी ठामपणे विरोध करतो. समाजातील प्रत्येक घटकाच्या न्याय्य मागण्यांचा आणि भावनांचा आम्ही मनापासून सन्मान करतो, असंही अजित पवारांनी म्हटलं आहे. 

कार्यकर्त्यांना आवाहन

    राष्ट्रवादी काँग्रेस पक्षाची ओळख ही छत्रपती शिवाजी महाराज, शाहू महाराज, महात्मा फुले आणि डॉ. बाबासाहेब आंबेडकर यांच्या लोकशाही, समता व बंधुत्वाच्या विचारांवरच उभी आहे. माझ्या सर्व सहकाऱ्यांना आणि कार्यकर्त्यांना मी स्पष्टपणे सांगू इच्छितो, सामाजिक जीवनात काम करत असताना नेहमी लोकशाही, शांतता आणि अहिंसा या मुल्यांना प्राधान्य द्या, असंही ते आपल्या पोस्टमधे म्हटले आहेत.