नवी दिल्ली -PAK Boycott Asia Cup: आशिया कप 2025 मध्ये पाकिस्तान क्रिकेट संघाच्या अडचणी वाढल्या आहेत. भारताकडून झालेल्या दारुण पराभवानंतर, संघाचा सुपर-4 मध्ये प्रवेश आता धोक्यात आला आहे. इतकेच नाही तर हँडशेक वादामुळे या मुद्द्याला आणखी बळकटी मिळाली आहे.

रविवारी दुबई आंतरराष्ट्रीय क्रिकेट स्टेडियमवर पाकिस्तानला सात विकेट्सने हरवल्यानंतर आशिया कपमध्ये भारतीय संघाने त्यांच्या प्रतिस्पर्धी खेळाडूंशी हस्तांदोलन केले नाही. एवढेच नाही तर यानंतर भारतीय कर्णधार सूर्यकुमार यादवने हा विजय पहलगाम दहशतवादी हल्ल्यात शहीद झालेल्या भारतीयांना आणि ऑपरेशन सिंदूरमध्ये सहभागी असलेल्या सैन्य दलाला समर्पित केला.

मैदानावरील पराभव आणि भारतीय संघाने आंतरराष्ट्रीय स्तरावर केलेल्या अपमानामुळे पाकिस्तान क्रिकेट बोर्ड (पीसीबी) चवताळले आहे. त्यांनी या संदर्भात आंतरराष्ट्रीय क्रिकेट परिषदेला (आयसीसी) हस्तक्षेप करण्याची मागणी केली आहे. पीसीबीचे प्रमुख आणि आशियाई क्रिकेट परिषदेचे (एसीसी) अध्यक्ष मोहसिन नक्वी यांनी सोमवारी आयसीसीकडे त्या सामन्याचे पंच अँडी पायक्रॉफ्ट यांना स्पर्धेतून काढून टाकण्याची मागणी केली आहे.

पाकची बहिष्कार टाकण्याची धमकी- 

संतप्त पाकिस्तानने 17 सप्टेंबर रोजी दुबईमध्ये होणाऱ्या यूएई विरुद्धच्या सामन्यातून माघार घेण्याची धमकीही दिली आहे कारण त्या सामन्यात पायक्रॉफ्ट हे देखील मॅच रेफरी आहेत. नक्वी म्हणाले की पीसीबीने मॅच रेफरीविरुद्ध क्रिकेटच्या भावनेशी संबंधित एमसीसी नियमांचे आणि आयसीसीच्या आचारसंहितेचे उल्लंघन केल्याबद्दल तक्रार दाखल केली आहे. पीसीबीने यापूर्वी एसीसीसमोर हा मुद्दा उपस्थित केला होता आणि भारतीय खेळाडूंचे वर्तन खेळाच्या भावनेविरुद्ध असल्याचे म्हटले होते.

तथापि, मॅच रेफरीने त्याच्यावर कोणतीही कारवाई केली नाही, ज्यामुळे पीसीबी आता त्याच्यावरील राग काढून आपला उर्वरित सन्मान वाचवू इच्छित आहे.

    मॅच रेफरी अँडी पायक्रॉफ्ट यांना हटवण्याची मागणी-

    खरंतर, भारत-पाक सामन्यादरम्यान (IND vs PAK Asia Cup Match), कर्णधार सूर्यकुमार यादवने नाणेफेकीदरम्यान आणि सामन्यानंतरही पाकिस्तानी खेळाडूंशी हस्तांदोलन केले नाही. संपूर्ण संघाने सूर्याला पाठिंबा दिला.

    सीमेवरील तणाव आणि पहलगाम दहशतवादी हल्ल्यानंतर भारतीय खेळाडूंनी पाकिस्तान (Pakistan National Cricket Team) पासून स्वतःला दूर केले. पीसीबीने यावर नाराजी व्यक्त केली आणि आयसीसी आणि एसीसीकडे तक्रार केली आणि ते 'स्पिरिट ऑफ क्रिकेट’ विरुद्ध असल्याचे म्हटले.

    त्यांनी मॅच रेफरी अँडी पायक्रॉफ्ट यांना काढून टाकण्याची मागणीही केली आहे. जर आयसीसीने मॅच रेफरी अँडी यांना स्पर्धेतून काढून टाकले नाही तर पाकिस्तान क्रिकेट बोर्डाने स्पर्धेवर बहिष्कार टाकण्याची धमकी दिली आहे.

    जर पाकिस्तानने आशिया कप सामन्यांवर बहिष्कार टाकला तर?

    जर पाकिस्तानने UAE (PAK Vs UAE) विरुद्ध मैदानात उतरण्यास नकार दिला, तर सामना मुहम्मद वसीमच्या संघाच्या बाजूने जाईल. या निकालानंतर, ओमानविरुद्धच्या विजयातून पाकिस्तानकडे फक्त दोन गुण शिल्लक राहतील, जे सुपर 4 टप्प्यात पोहोचण्यासाठी पुरेसे नसतील.

    युएईने ओमानचा 42 धावांनी पराभव केला होता आणि त्यामुळे पाकिस्तानने सामन्यावर बहिष्कार टाकल्याने संघाला चार गुण मिळतील आणि पाक संघ सुपर 4 मध्ये भारतासोबत प्रवेश करेल.

    याशिवाय, जर UAE विरुद्ध PAK (UAE vs PAK Match Boycott threat) सामना पावसामुळे रद्द झाला, तर चांगल्या नेट रन रेटमुळे पाकिस्तान पुढे जाईल.

    सुपर-4 फेरीतील समीकरण -

    आशिया कप 2025 च्या ग्रुप अ मध्ये पाकिस्तान सध्या पॉइंट्स टेबलमध्ये दुसऱ्या स्थानावर आहे आणि त्यांच्या खात्यात फक्त 2 गुण आहेत. भारताने सुपर-4 मध्ये आपले स्थान आधीच निश्चित केले आहे. आता १७ सप्टेंबर रोजी दुबई येथे होणारा पाकिस्तान विरुद्ध यूएई सामना दोन्ही संघांसाठी करो या मरो असा असेल.

    युएईकडे मोठी संधी आहे-

    यूएईचा कर्णधार मुहम्मद वसीमकडे मोठा इतिहास रचण्याची संधी आहे. ओमानला 42 धावांनी हरवल्यानंतर यूएई संघाचा आत्मविश्वास उंचावला आहे आणि पाकिस्तानला हरवून ते स्पर्धेतील सर्वात मोठा अपसेट निर्माण करू इच्छितात.

    दुसरीकडे, पाकिस्तानला कोणत्याही परिस्थितीत हा सामना जिंकावाच लागेल. भारताविरुद्धच्या पराभवानंतर संघाचा आत्मविश्वास डळमळीत झाला आहे आणि कर्णधार सलमान अली आघा याला खेळाडूंकडून सर्वोत्तम कामगिरी करून घ्यावी लागेल.