डिजिटल डेस्क, नवी दिल्ली. Mann Ki Baat Updates: पंतप्रधान नरेंद्र मोदी यांच्या 'मन की बात' या रेडिओ शोचा 123 वा भाग प्रसारित झाला आहे. देशवासियांना संबोधित करताना ते म्हणाले की, "यावेळी तुम्ही आंतरराष्ट्रीय योग दिनाच्या उर्जेने भरलेले आहात. याची सुरुवात 10 वर्षांपूर्वी झाली होती आणि आज तो संपूर्ण जगात पसरला आहे. योग दिनाची सुंदर छायाचित्रे पाहायला मिळाली. योग आता सक्षमीकरणाचे माध्यम बनले आहे."
पंतप्रधान मोदी म्हणाले, "21 जून रोजी देश आणि जगभरातील लाखो लोकांनी आंतरराष्ट्रीय योग दिन सोहळ्यात भाग घेतला. याची सुरुवात 10 वर्षांपूर्वी झाली होती. या 10 वर्षांत प्रत्येक वर्षी त्याची परंपरा पूर्वीपेक्षा अधिक भव्य होत गेली आहे. हे दर्शवते की अधिक लोक योगाला आपल्या जीवनात समाविष्ट करत आहेत."
'मन की बात'मधील मुख्य मुद्दे
- धार्मिक यात्रा: पंतप्रधान मोदी म्हणाले, "धार्मिक यात्रा या सेवेच्या संधीचा महा-अनुष्ठान असतात. जेवढे लोक यात्रेत जातात, त्याहून अधिक लोक त्यांच्या सेवेत गुंततात. बऱ्याच कालावधीनंतर कैलास मानसरोवर यात्रा सुरू झाली आहे. हिंदू, बौद्ध, जैन परंपरेत कैलासला श्रद्धेचे केंद्र मानले गेले आहे. जेव्हा कोणी तीर्थयात्रेला जातो, तेव्हा मनात एक भावना येते, 'चलो बुलावा आया है'." हीच भावना आपल्या धार्मिक यात्रांचा आत्मा आहे.
- आरोग्य क्षेत्रातील यश: त्यांनी हेही सांगितले की, 'जागतिक आरोग्य संघटनेने' (WHO) भारताला 'ट्रॅकोमा-मुक्त' (Trachoma free) घोषित केले आहे. "आता भारत ट्रॅकोमा-मुक्त देश बनला आहे. हे त्या लाखो लोकांच्या मेहनतीचे फळ आहे, ज्यांनी न थकता, न थांबता या आजाराशी लढा दिला. हे यश आपल्या आरोग्य कर्मचाऱ्यांचे आहे."
- आणीबाणीच्या आठवणी: आणीबाणीच्या काळाची आठवण करून देताना पंतप्रधान मोदी म्हणाले की, "आणीबाणी लावणाऱ्यांनी केवळ आपल्या संविधानाची हत्या केली नाही, तर त्यांचा हेतू न्यायपालिकेलाही आपले गुलाम बनवून ठेवण्याचा होता. या काळात लोकांना मोठ्या प्रमाणावर त्रास दिला गेला. याची अशी अनेक उदाहरणे आहेत, जी कधीही विसरता येणार नाहीत."
- सरकारी योजना: ते पुढे म्हणाले, "नुकताच 'इंटरनॅशनल लेबल ऑर्गनायझेशन'चा (International Labour Organization) अहवाल आला आहे. त्यात समोर आले आहे की, देशातील 95 कोटी लोक कोणत्या ना कोणत्या सरकारी योजनेचा लाभ घेत आहेत. या यशाने एक विश्वास दिला आहे की, येत्या काळात भारत आणखी सशक्त होईल. मित्रांनो, जनतेच्या सहभागाने देश आणखी पुढे जात आहे."
- बोडोलँडमधील बदल: "बोडोलँड आज आपल्या नवीन रूपाने देशासमोर उभे आहे. बोडो टेरिटोरियल एरियामध्ये तीन हजारांहून अधिक संघ आणि 70 हजारांहून अधिक खेळाडू फुटबॉल खेळत आहेत. एक काळ होता जेव्हा बोडोलँड संघर्ष करत होता. आज येथून निघालेले फुटबॉल खेळाडू आपली ओळख निर्माण करत आहेत."
- आरोग्यासाठी सल्ला: "जर आपल्याला आपले सामर्थ्य वाढवायचे असेल, तर आरोग्यावर लक्ष द्यावे लागेल. जेवणात 10 टक्के तेल कमी करा आणि लठ्ठपणा कमी करा."
यापूर्वी पंतप्रधान मोदींनी 'मन की बात'च्या 122 व्या भागात 'ऑपरेशन सिंदूर'बद्दल भाष्य केले होते.