राजकोट. सुरेन्द्रनगरमध्ये रानटीपणाची एक भयानक घटना समोर आली आहे. एका विवाहित महिलेला आणि तिच्या साथीदाराला कथितपणे सर्वांसमोर लैंगिक संबंध ठेवण्यासाठी आणि शुद्धीकरणाच्या विधीच्या नावाखाली महिलेचे मूत्र पिण्यासाठी भाग पाडले गेले.
आरोप आहे की ४ ऑक्टोबरला महिलेला आणि तिच्या साथीदाराला तिच्या नवऱ्याने आणि त्याच्या नातेवाईकांनी या ही भयानक शिक्षा दिली. आरोपींनी या कृत्यांना मोबाईल फोनमध्ये रेकॉर्डही केले आणि व्हिडिओ सोशल मीडियावर व्हायरल केला. व्हायरल व्हिडिओ पाहिल्यानंतर पोलिसांनी महिलेचा शोध घेतला आणि तिच्या पती व नातेवाईकांसह नऊ जणांना अटक केली.
काय आहे प्रकरण?
तक्रारीनुसार, महिलेचे लग्न वापीतील एका व्यक्तीशी झाले होते. ती तिच्या नवऱ्याला सोडून चोटिला येथे गेली होती, जिथे ती जवळपास तीन महिने तिच्या साथीदारासोबत राहिली. नंतर तिच्या कुटुंबाने तिला शोधून काढले, परत वापीला घेऊन आले आणि कथितपणे एका घरात कैद करून ठेवले. ती येथून पळून गेली आणि पाच दिवसांपूर्वी चोटिला येथे परत आली.
शुद्धीकरणाच्या नावाखाली घृणास्पद कृत्य
जेव्हा तिच्या नवऱ्याला कळाले की ती तिच्या पार्टनरसोबत परत आली आहे, तेव्हा त्याने कथितपणे आपल्या नातेवाईकांना याची माहिती दिली. नातेवाईकांनी त्या जोडप्याला शोधले, त्यांना सुरेन्द्रनगरमधील एका घरात आणले आणि कथित शुद्धीकरण विधीच्या नावाखाली त्यांना मारहाण केली.
पोलिसांना कशी झाली प्रकरणाची माहिती?
सुरेन्द्रनगरचे डीएसपी प्रेमसुख डेलू यांनी सांगितले की, पोलिसांना या घटनेबद्दल तेव्हा कळाले जेव्हा एका समाजाच्या नेत्याने त्यांना माहिती दिली आणि मारहाणीचे व्हिडिओ सोशल मीडियावर समोर आले. डेलू म्हणाले, "मला समाजाच्या एका नेत्याचा फोन आला ज्यामध्ये एका महिलेसोबत झालेल्या अत्याचाराबद्दल सांगण्यात आले. आम्हाला अनेक व्हिडिओही मिळाले. महिलेचा शोध घेण्यासाठी पोलिसांची अनेक पथके तैनात करण्यात आली.
पोलीस पथकांनी परिसरातील घरांची झडती घेतली आणि महिलेला एका घरात शोधून काढले. डेलू यांनी सांगितले, पोलिसांना पाहताच ती रडू लागली. आम्ही व्हिडिओमध्ये दिसणाऱ्या महिलेशी तिचा चेहरा जुळवला आणि तिला पोलीस ठाण्यात घेऊन आलो. समुपदेशनानंतर तिने आपली आपबीती सांगितली.
महिलेसोबत लैंगिक संबंध ठेवण्यास भाग पाडले -
तक्रारीनुसार, आरोपी जोडप्याला सुरेन्द्रनगरला घेऊन गेले आणि म्हणाले की ते शुद्धीकरणाचा विधी करणार आहेत. कथितपणे त्यांनी काठ्यांनी त्यांना जबर मारहाण केली. यानंतर तिच्या मित्राला दोरीने एका झाडाला बांधण्यात आले, तर महिलेला एका खोलीत बंद करण्यात आले. आरोप आहे की नंतर आरोपींनी त्या माणसाला भाग पाडले की त्याने घराच्या व्हरांड्यात सर्वांसमोर महिलेसोबत लैंगिक संबंध ठेवावेत. जमावाने दोघांना अपमानित केले व असाही आरोप आहे की माणसाला महिलेचे मूत्र पिण्यासाठीही भाग पाडले गेले.
पोलिसांनी सांगितले की या संपूर्ण घटनेला मोबाईल फोनमध्ये रेकॉर्ड केले गेले आणि व्हिडिओ सोशल मीडियावर पसरवला गेला. व्हिडिओ कोणी रेकॉर्ड केले आणि ते सोशल मीडियावर कोणी पसरवले या गोष्टीचाही पोलीस तपास करत आहेत.
