नवी दिल्ली: Bihar Election : बिहार विधानसभा निवडणुकीच्या अगदी आधी माजी रेल्वे मंत्री लालू प्रसाद यादव, राबडी देवी आणि तेजस्वी यादव यांना मोठा धक्का बसला आहे.
दिल्लीतील राऊस अव्हेन्यू येथील विशेष न्यायाधीशांच्या न्यायालयाने आज (सोमवार) माजी रेल्वे मंत्री लालू प्रसाद यादव यांच्याविरुद्ध आयआरसीटीसी हॉटेल भ्रष्टाचार प्रकरणात आयपीसीच्या कलम 420, 120 आणि भ्रष्टाचार प्रतिबंधक कायदा (पीसी कायदा) अंतर्गत आरोप निश्चित केले आहेत.
लालू यादव रेल्वेमंत्री असताना रांची आणि पुरी येथील दोन आयआरसीटीसी हॉटेल्सच्या निविदा वाटपात भ्रष्टाचार झाल्याचा हा खटला आहे. हॉटेल वाटपाच्या बदल्यात कुटुंबाला फायदा व्हावा यासाठी जमिनीचे व्यवहार करण्यात आल्याचा आरोप आहे.
आयआरसीटीसी हॉटेल घोटाळा आणि नोकरीसाठी जमीन घोटाळ्यात त्यांच्यावर आरोप निश्चित करण्यात आले. लालू यादव आज राऊस अव्हेन्यूवरील विशेष न्यायालयात व्हीलचेअरवरून पोहोचले. त्यांच्यासोबत त्यांची पत्नी आणि बिहारच्या माजी मुख्यमंत्री राबडी देवी आणि मुलगा तेजस्वी यादव हे होते.
लालू प्रसाद यादव, त्यांची पत्नी आणि माजी मुख्यमंत्री राबडी देवी आणि मुलगा आणि माजी उपमुख्यमंत्री तेजस्वी यादव आणि इतर आरोपींविरुद्ध खटला पुढे चालवायचा की नाही यावर आज न्यायालयाने निर्णय दिला.
24 सप्टेंबर रोजी न्यायालयाने सर्व आरोपींना हजर राहण्याचे निर्देश दिले होते. दोन्ही प्रकरणांमधील युक्तिवाद पूर्ण झाले आहेत आणि न्यायालयाने आपला निकाल राखून ठेवला आहे. या प्रकरणांमधील निकालाचा आगामी बिहार विधानसभा निवडणुकीवर मोठा परिणाम होऊ शकतो.