पीटीआय, नवी दिल्ली. Rahul Gandhi On Arun Jaitley: काँग्रेस नेते राहुल गांधी यांनी शनिवारी माजी केंद्रीय मंत्री आणि भाजपचे दिवंगत नेते अरुण जेटली यांच्याबद्दल टिप्पणी केली होती. यावरून भाजपने राहुल यांच्यावर निशाणा साधला आहे आणि त्यांचे विधान तथ्यात्मकदृष्ट्या चुकीचे असल्याचे म्हटले आहे. अरुण जेटली यांच्या मुलानेही राहुल यांच्या टिप्पणीवर टीका केली आहे.
राहुल यांनी अरुण जेटलींबद्दल म्हटले होते की, कृषी कायद्यांविरोधात आवाज उचलल्यामुळे अरुण जेटली यांनी त्यांना धमकावले होते. भाजप नेते अमित मालवीय यांनी ही 'फेक न्यूज' असल्याचे म्हणत सांगितले की, अरुण जेटली यांचे निधन 2019 मध्येच झाले होते, तर कृषी कायदे 2020 मध्ये लागू झाले होते.
अमित मालवीय यांनी साधला निशाणा
मालवीय यांनी सोशल मीडिया साईट 'X' वर लिहिले, "राहुल गांधी दावा करत आहेत की, कृषी कायद्यांना विरोध केल्यामुळे अरुण जेटली यांनी 2020 मध्ये त्यांच्याशी संपर्क साधला होता. सत्य हे आहे की, अरुण जेटली यांचे निधन 24 ऑगस्ट 2019 रोजी झाले होते, तर कृषी विधेयकांचा मसुदा 3 जून 2020 रोजी केंद्रीय मंत्रिमंडळात आणला गेला होता."
मालवीय म्हणाले की, "हे कायदे सप्टेंबर 2020 मध्ये लागू करण्यात आले होते. त्यामुळे, अरुण जेटली यांनी त्यांच्याशी कोणत्याही गोष्टीसाठी संपर्क साधला होता, असे म्हणणे तथ्यात्मकदृष्ट्या चुकीचे आणि दिशाभूल करणारे आहे." तर अरुण जेटली यांचे चिरंजीव रोहन जेटली यांनीही राहुल यांच्यावर हल्ला चढवला. ते म्हणाले, "मी राहुल यांना आठवण करून देऊ इच्छितो की, माझ्या वडिलांचे निधन 2019 मध्ये झाले होते आणि कृषी कायदे 2020 मध्ये सादर केले गेले होते."
रोहन जेटली पुढे म्हणाले, "माझ्या वडिलांच्या स्वभावात कोणाला धमकावणे नव्हते. ते कट्टर लोकशाहीवादी व्यक्ती होते आणि सर्वसंमतीने निर्णय घेण्यावर त्यांचा विश्वास होता. जे लोक आपल्यात नाहीत, त्यांच्याबद्दल बोलताना राहुल गांधींनी सावधगिरी बाळगली पाहिजे. राहुल यांनी मनोहर पर्रीकर यांच्यासोबतही असेच करण्याचा प्रयत्न केला होता."