जेएनएन, सोलापूर: ऊसाला पहिली उचल प्रतिटन 3500 रुपये मिळावी, या मागणीवरून सोलापूर जिल्ह्यातील ऊस उत्पादक शेतकरी आक्रमक झाले आहेत. स्वाभिमानी शेतकरी संघटनेचे प्रमुख राजू शेट्टी यांनी दिलेल्या आंदोलनाच्या इशाऱ्यानंतर आता जिल्ह्यातील शेतकऱ्यांनी प्रत्यक्ष आंदोलनाला सुरुवात केली आहे. माढा तालुक्यात शेतकऱ्यांनी ऊस वाहतूक रोखण्यास सुरुवात केली असून, मागणी मान्य न करता ऊस वाहतूक सुरू ठेवल्यास ट्रॅक्टरची टायर फोडण्याचा इशारा दिला आहे. त्यामुळे सोलापूर जिल्ह्यातील ऊसदराचा प्रश्न चांगलाच पेटण्याची चिन्हे आहेत.

यंदाच्या ऊस गाळप हंगामात शेतकऱ्यांना योग्य दर मिळावा, यासाठी स्वाभिमानी शेतकरी संघटनेने आक्रमक भूमिका घेतली आहे. ऊस उत्पादक शेतकऱ्यांच्या उत्पादन खर्चात सातत्याने वाढ होत असताना साखर कारखान्यांकडून मिळणारा दर समाधानकारक नसल्याची शेतकऱ्यांची भूमिका आहे. त्यामुळे ऊसाला पहिली उचल प्रतिटन 3500 रुपये जाहीर करावी, अशी मागणी करण्यात येत आहे. ही मागणी मान्य होईपर्यंत साखर कारखान्यांनी गाळप सुरू करू नये, अशी भूमिका शेतकऱ्यांनी घेतली आहे. 

माढ्यात ऊस वाहतूक रोखण्यास सुरुवात 

राजू शेट्टी यांच्या आंदोलनाच्या इशाऱ्यानंतर माढा तालुक्यातील शेतकरी रस्त्यावर उतरले आहेत. ऊस वाहतूक करणाऱ्या वाहनांना अडवून वाहतूक रोखण्याचा प्रयत्न केला जात आहे. ऊसदराचा प्रश्न निकाली निघेपर्यंत कारखान्यांनी ऊसतोडणी आणि वाहतूक सुरू ठेवू नये, अशी मागणी आंदोलकांनी केली आहे. शेतकऱ्यांच्या मागण्यांकडे दुर्लक्ष करून वाहतूक सुरू ठेवल्यास ट्रॅक्टरची टायर फोडण्यात येतील, असा इशाराही देण्यात आला आहे. 

3500 रुपये पहिली उचल मिळेपर्यंत कारखाने बंद ठेवण्याची मागणी 

ऊस उत्पादक शेतकऱ्यांना प्रतिटन 3500 रुपये पहिली उचल मिळाली पाहिजे, यावर आंदोलक ठाम आहेत. जोपर्यंत हा दर जाहीर होत नाही, तोपर्यंत साखर कारखान्यांनी गाळप बंद ठेवावे, अशी मागणी करण्यात आली आहे. त्यामुळे आगामी काळात साखर कारखानदार आणि शेतकरी संघटना यांच्यातील संघर्ष आणखी वाढण्याची शक्यता आहे.

    19 नोव्हेंबरला पालकमंत्र्यांच्या उपस्थितीत महत्त्वाची बैठक

    दरम्यान, ऊसदराच्या प्रश्नावर तोडगा काढण्यासाठी 19 नोव्हेंबर रोजी पालकमंत्री जयकुमार गोरे यांच्या उपस्थितीत सोलापूर जिल्ह्यातील साखर कारखानदारांची बैठक होणार आहे. या बैठकीत ऊस उत्पादक शेतकऱ्यांच्या मागण्यांवर चर्चा होण्याची शक्यता आहे. या बैठकीत प्रतिटन 3500 रुपये पहिली उचल जाहीर झाली नाही, तर आंदोलन अधिक तीव्र करण्याचा इशारा शेतकऱ्यांनी दिला आहे.

    19 तारखेपर्यंत ऊसतोडणी बंद ठेवण्याचे आवाहन

    या पार्श्वभूमीवर सोलापूर जिल्हाधिकारी कार्यालयाकडूनही पत्रक काढण्यात आले आहे. 19 नोव्हेंबरपर्यंत साखर कारखान्यांनी ऊसतोडणी बंद ठेवावी, अशा आशयाचे निर्देश या पत्रकातून देण्यात आल्याची माहिती आहे. त्यामुळे आता 19 नोव्हेंबरच्या बैठकीकडे जिल्ह्यातील ऊस उत्पादक शेतकरी आणि साखर कारखानदारांचे लक्ष लागले आहे.