जेएनएन, सातारा: प्रतापगडावर शिवप्रताप दिनाचे (Shiv Pratap Din 2025) आयोजन होत असल्याने कायदा आणि सुव्यवस्था अबाधित ठेवण्यासाठी प्रशासनाने कडक पावले उचलली आहेत. गडावरील अफजलखान कबर परिसरात जमावबंदी व प्रतिबंधात्मक आदेश लागू करण्यात आले आहेत.

आजपासून आदेश लागू

पोलिस अधीक्षक तुषार दोषी यांनी जारी केलेला हा आदेश 26 नोव्हेंबर ते 24 जानेवारी रोजीच्या मध्यरात्रीपर्यंत लागू राहणार असल्याचे आदेशपत्रात नमूद केले आहे.

खबरदारी म्हणून उपाययोजना 

अफजलखान कबरच्या भोवती 300 मीटर परिसरात कोणत्याही प्रकारचे जमाव, सभा, मोर्चे किंवा संशयित हालचालींवर कडक निर्बंध घालण्यात आले आहेत. शिवप्रताप दिनाच्या पार्श्वभूमीवर मोठ्या संख्येने पर्यटक आणि शिवभक्त प्रतापगडावर येणार असल्याने कोणतीही अनुचित घटना घडू नये, यासाठी खबरदारी म्हणून उपाययोजना करण्यात आली आहे.

    शिवप्रताप दिनासाठी सुयोग्य नियोजन करण्याचे आदेश

    दरम्यान, जिल्हाधिकारी संतोष पाटील यांनी सर्व विभागांना शिवप्रताप दिनासाठी सुयोग्य नियोजन करण्याचे आदेश दिले आहेत. 27 नोव्हेंबर रोजी होणाऱ्या मुख्य कार्यक्रमासाठी गडावरील संपूर्ण स्वच्छता, विद्युत रोषणाई आणि ऐतिहासिक मर्दानी खेळ-पोवाड्यांचे आयोजन करण्याचे निर्देश देण्यात आले आहेत. 

    पर्यटकांच्या सोयीसाठी एस.टी. महामंडळाने विशेष बसेसची व्यवस्था करावी, तसेच अल्पोपहार आणि पाण्याचीही सोय करण्यात यावी, असे सूचित करण्यात आले आहे. 

    महाबळेश्वर-प्रतापगड व प्रतापगड-पोलादपूर या मार्गांवरील खड्डे त्वरित भरून वाहतुकीची सोय सुरळीत करण्याचे आदेशही देण्यात आले आहेत. शिवप्रताप दिनाचे नियोजन सुरळीत पार पडावे आणि कोणताही कायदा-सुव्यवस्थेचा प्रश्न निर्माण होऊ नये यासाठी पोलिस, प्रशासन आणि पर्यटन विभाग यांच्यात समन्वय साधण्यावर भर देण्यात आला आहे.