डिजिटल डेस्क, पुणे: पुण्यातील ऐतिहासिक सिंहगड किल्ल्यावर पर्यटकांच्या कपड्यांवरून वाद झाल्याची धक्कादायक घटना समोर आली आहे. शॉर्ट्स घातल्याच्या कारणावरून एका कुटुंबासह काही पर्यटकांना मारहाण आणि धमकावल्याचा आरोप करण्यात आला आहे. या प्रकरणी पुणे हवेली पोलिसांनी नऊ जणांविरुद्ध गुन्हा दाखल केला आहे.
ही घटना १६ ऑगस्ट रोजी सिंहगड किल्ल्यावर घडल्याचे सांगण्यात येत आहे. स्वातंत्र्यदिनानंतरचा रविवार असल्याने किल्ल्यावर मोठी गर्दी होती. याचदरम्यान एका कुटुंबातील ८ वर्षांच्या मुलीने शॉर्ट्स घातल्याचे पाहून काही जणांनी त्यांना अडवले. मुलीने अशा प्रकारचे कपडे का घातले आहेत, असा सवाल करत त्यांच्याशी वाद घातल्याचा आरोप आहे.
कपड्यांवरून वाद, कुटुंबाला मारहाण
पोलिसांच्या माहितीनुसार, कपड्यांवरून झालेल्या वादाचे रूपांतर मारहाणीत झाले. कुटुंबातील एका सदस्यावर हल्ला करण्यात आल्याचा आरोप आहे. संबंधित व्यक्तींनी आपण किल्ला संरक्षण समितीचे सदस्य असल्याचा दावा केल्याचेही पोलिसांनी सांगितले.
आरोपींनी पर्यटकांचा पोशाख योग्य नसल्याचे सांगत त्यांना रोखले. यावेळी काही पर्यटकांनाही धमकावण्यात आल्याचा आरोप आहे. संबंधित कुटुंबाला तब्बल दोन तास रोखून ठेवून धमकावल्याचा दावा करण्यात आला आहे.
'नैतिक पोलिसगिरी'वर प्रश्नचिन्ह
या घटनेमुळे ऐतिहासिक आणि पर्यटनस्थळी पर्यटकांच्या वैयक्तिक पोशाखावरून हस्तक्षेप करण्याचा अधिकार नेमका कोणाला आहे, असा प्रश्न उपस्थित झाला आहे. विशेषतः एका अल्पवयीन मुलीसमोर तिच्या कुटुंबीयांना मारहाण आणि धमकावल्याच्या आरोपामुळे या घटनेवर संताप व्यक्त केला जात आहे.
पुणे पोलीस अधीक्षक संदीप सिंग गिल यांच्या माहितीनुसार, घटनेची दखल घेत हवेली पोलिसांनी नऊ जणांविरुद्ध गुन्हा दाखल केला आहे. या प्रकरणाचा पुढील तपास सुरू असून, मारहाण, धमकी आणि पर्यटकांना अडवून ठेवण्याच्या आरोपांची चौकशी केली जात आहे.
सिंहगडासारख्या ऐतिहासिक पर्यटनस्थळी पर्यटकांच्या सुरक्षिततेचा आणि सन्मानाचा प्रश्न पुन्हा एकदा ऐरणीवर आला आहे. कायदा हातात घेऊन पर्यटकांच्या कपड्यांवरून 'नैतिक पोलिसगिरी' करण्याच्या प्रकारावर कठोर कारवाईची मागणी होत आहे.
हेही वाचा: Ola-Uber-Rapido Drivers: ओला-उबर, रॅपिडो चालकांना मराठी सक्तीची; परवाना आणि बॅजही अनिवार्य
