एजन्सी, पुणे: पुणे जिल्ह्यात एका 79 वर्षीय वृद्ध महिलेचा इलेक्ट्रिक बसमध्ये चढण्याचा प्रयत्न करत असताना तिच्या मागील चाकाखाली आल्याने मृत्यू झाल्याची माहिती पोलिसांनी रविवारी दिली. ही घटना 29 ऑक्टोबर रोजी दुपारी 12 च्या सुमारास हडपसर परिसरात घडली.
कमलाबाई दादू लोंढे असे मृत महिलेचे नाव असून त्या एका मंदिराला भेट देण्यासाठी सासवडला जात होत्या.
भेकराई नगर डेपोतून चालवली जाणारी ही इलेक्ट्रिक बस हडपसर गाडीतळावरून सासवडच्या दिशेने जात असताना लोंढे यांनी चालत्या बसमध्ये मागील दरवाजातून चढण्याचा प्रयत्न केला. त्यांचा तोल गेला आणि त्यांचे पाय बसच्या मागील चाकाखाली आले, अशी माहिती हडपसर पोलीस ठाण्याचे उपनिरीक्षक राघवेंद्र सलगार यांनी PTI ला दिली.
महिलेला तातडीने जवळच्या रुग्णालयात नेण्यात आले, तेथे डॉक्टरांनी तिला मृत घोषित केले, असे अधिकाऱ्याने सांगितले.
हडपसर पोलिसांनी शनिवारी बस चालकाविरुद्ध भारतीय न्याय संहितेच्या कलम 106 (1) (निष्काळजीपणाने मृत्यू घडवून आणणे) आणि 281 (बेदरकारपणे गाडी चालवणे) तसेच मोटार वाहन कायद्याच्या तरतुदींनुसार गुन्हा दाखल केला आहे.
चालकाची वैद्यकीय तपासणी करण्यात आली, ज्यामध्ये त्याने मद्यप्राशन केले नसल्याची पुष्टी झाली. त्याला तपासासाठी पोलिसांसमोर हजर राहण्याची नोटीस बजावण्यात आली आहे, असे अधिकाऱ्याने सांगितले.
