नाशिक- प्रेमविवाह केल्याच्या रागातून मुलीच्या नातेवाईकांनी लग्नमंडपातच नवरदेव आणि त्याच्या नातेवाईकांना जिवंत जाळण्याचा प्रयत्न केल्याची धक्कादायक घटना नाशिक जिल्ह्यातील येवला शहरात घडली आहे. येवला शहरातील एका लॉन्समध्ये विवाह सोहळा सुरू असताना हा प्रकार घडल्याची माहिती आहे. या वेळी दोन्ही गटांमध्ये जोरदार हाणामारी झाली. या घटनेत सात ते आठ जण जखमी झाले असून, पोलिसांनी संशयित आरोपींना ताब्यात घेतल्याचे सांगण्यात येत आहे. या प्रकरणी दोन्ही बाजूंनी गुन्हे दाखल करण्यात आले आहेत.
प्रेमविवाहानंतर आयोजित केला होता विवाह सोहळा
माहितीनुसार, येवला येथील एका तरुणाचे निफाड तालुक्यातील तरुणीसोबत प्रेमसंबंध होते. या दोघांनी कुटुंबीयांच्या विरोधाची शक्यता असताना घरातून निघून जाऊन नोंदणीकृत विवाह केला होता. त्यानंतर मुलाच्या नातेवाईकांनी दोघांचा पारंपरिक पद्धतीने विवाह सोहळा आयोजित केला होता. या सोहळ्यासाठी नातेवाईक आणि परिचित मंडळी उपस्थित होती.
मात्र, तरुणीच्या नातेवाईकांमध्ये या प्रेमविवाहावरून नाराजी असल्याचा आरोप आहे. याच रागातून काही जण विवाह सोहळ्याच्या ठिकाणी पोहोचले आणि वादाला सुरुवात झाली. सुरुवातीला झालेल्या वादाचे रूपांतर पुढे जोरदार हाणामारीत झाल्याचे सांगण्यात येत आहे.
डिझेलचे कॅन ओतल्याचा आरोप
लग्नमंडपात झालेल्या या वादादरम्यान मुलीच्या नातेवाईकांनी डिझेलचे कॅन ओतून नवरदेव आणि त्याच्या नातेवाईकांना जिवंत जाळण्याचा प्रयत्न केल्याचा गंभीर आरोप करण्यात आला आहे. प्रेमविवाहाच्या वादातून हा हल्ला झाल्याचे सांगितले जात आहे. या प्रकारामुळे विवाह सोहळ्याच्या ठिकाणी एकच गोंधळ उडाला.
दोन्ही गटांतील व्यक्तींमध्ये जोरदार हाणामारी झाल्याने लग्नासाठी जमलेल्या पाहुण्यांमध्ये भीतीचे वातावरण निर्माण झाले. या संघर्षात सात ते आठ जण जखमी झाले. जखमींना उपचारासाठी रुग्णालयात दाखल करण्यात आल्याची माहिती आहे.
पोलिसांकडून कारवाई; दोन्ही गटांविरोधात गुन्हे
घटनेची माहिती मिळताच पोलिसांनी हस्तक्षेप करत परिस्थिती नियंत्रणात आणली. या प्रकरणी संशयित आरोपींना ताब्यात घेण्यात आले असून, दोन्ही गटांच्या तक्रारींच्या आधारे गुन्हे दाखल करण्यात आले आहेत. पोलिसांकडून या प्रकरणाचा पुढील तपास सुरू आहे.
प्रेमविवाहाच्या वादातून विवाह सोहळ्यातच हिंसक संघर्ष झाल्याने परिसरात खळबळ उडाली आहे. या घटनेमागील नेमकी कारणे, हल्ल्यात सहभागी असलेल्या व्यक्तींची भूमिका आणि जिवंत जाळण्याचा प्रयत्न झाल्याच्या आरोपातील तथ्य तपासातून स्पष्ट होणार आहे.
