जेएनएन, नागपूर, Nagpur Latest News: नागपूर शहरातील पाण्याची गळती, पाण्याचा दाब, शहरातील नळाचे अवैध कनेक्शन तसेच 24 तास पाणी पुरवठा करण्याच्या संदर्भातील समस्या एक महिन्यात सोडवून ओसीडब्ल्यूने शहरातील पाणी पुरवठा सुरळीत करावा, असे निर्देश केंद्रीय भूपृष्ठ वाहतूक व राष्ट्रीय महामार्ग मंत्री नितीन गडकरी यांनी महापालिकेत घेतलेल्या आढावा बैठकीत दिले.
शहरातील पाणी पुरवठा तसेच पिवळी नदी, पोहरा नदी व नागनदी पुनरुज्जीवनाच्या संदर्भात महापालिकेच्या मुख्यालयातील सभाकक्षात केंद्रीय मंत्री नितीन गडकरींनी आढावा घेतला.
पाण्याच्या वितरण प्रणालीचे आधुनिक पद्धतीने निरीक्षण करा
नागपूर शहराला पाण्याचे वितरण करण्याची जबाबदारी ओसीडब्ल्यू या संस्थेकडे आहे. शहराला 24 तास पाणी पुरवठा करण्याच्या संदर्भात निर्णयाच्या अंमलबजावणीची माहिती केंद्रीय मंत्री नितीन गडकरी यांनी घेतली.
पाटबंधारे विभागाकडून दररोज 750 दशलक्ष लिटर पाण्याचा पुरवठा होत आहे. यातून शहरातील सर्व भागांना नियमित व सुरळीत पाणी पुरवठा होण्याची गरज असताना अनेक भागात अद्यापही योग्य दाबाने पाणी पुरवठा होत नाही. काही भागात केवळ 2 ते 3 तास पाणी पुरवठा होत असल्याच्या नागरिकांच्या तक्रारी असल्याचे निदर्शनास आणून दिले.
नागपूर शहरात असलेल्या सर्व पाण्याच्या टाकीमधून किती दाबाने पाणी पुरवठा होत आहे, याची डीजीटल माहिती उपलब्ध करून पाण्याच्या वितरण प्रणालीचे आधुनिक पद्धतीने निरीक्षण करावे, असेही निर्देशही केंद्रीय मंत्री नितीन गडकरी यांनी यावेळी दिले.
अवैध कनेक्शनवर कारवाई करा
नागपूर शहरात असलेल्या पाण्याच्या अवैध कनेक्शन असलेल्यांवर ओसीडब्ल्यूने तात्काळ कारवाई करावी, असे निर्देश देऊन ते म्हणाले, यासाठी सर्व पक्षांच्या नेत्यांच्या सहकार्य आहे. शहरात असलेले अवैध कनेक्शन व वैध कनेक्शनची स्वतंत्रपणे पाहणी करावी, सर्व नळधारकांना किमान योग्य दाबाने पाणी पुरवठा झाला पाहिजे. तसेच ज्या भागात कमी पाणी पुरवठा होत आहे. त्यांना रेड झोनमध्ये टाकावे व एका महिन्यात ग्रीन झोनमध्ये कन्व्हर्ट करावे. तसेच अवैध कनेक्शन कोणत्या झोनमध्ये अधिक आहे, याची पाहणी करून त्यांच्यावर कारवाई करावी, असे निर्देश त्यांनी दिले.
नाग नदी व पोहरा नदींचे पुनरुज्जीवन
नागपूर शहरातील पिवळी नदी, नागनदी व पोहरा नदीचे पुनरुज्जीवनाच्या व प्रदूषण कमी करण्याच्या संदर्भातील सुरू असलेले सर्वेक्षण पुढील तीन महिन्यात पूर्ण करावे व निविदा काढाव्या, असे निर्देश केंद्रीय मंत्री नितीन गडकरी यांनी दिले.
या तिन्ही नद्यांच्या पुनरुज्जीवनासाठी जपानीझ इंटरनॅशनल कोऑपरेशन एजेंसी (जेआयसीए) मार्फत वित्तीय पुरवठा दिला जात आहे. या तिन्ही नद्यांचे पुनरुज्जीवनाचे डिझाईनचे कंत्राट टाटा कन्सलटन्सी इंजिनिअर्स (टीसीई) दिले आहे. नागनदी व पोहरा नदीमध्ये सध्या सोडण्यात येणाऱ्या मलनिःसारण वाहिन्या बंद केल्या जाणार आहे.
यासाठी नवीन मलवाहिन्या बांधण्यात येणार आहे. यामुळे पिवळी नदी, नाग नदी व पोहरा नदी प्रदूषणमुक्त व स्वच्छ होण्यास मदत होणार आहे. टाकाऊ जल वाहिनी व मलनिःसारण वाहिन्या दोन वेगळ्या ठेवाव्या, यासाठी नवा डीपीआर तयार करण्याचे निर्देश केंद्रीय मंत्री नितीन गडकरी यांनी टाटा कन्सलटन्सीच्या अधिकाऱ्यांना दिले.