जेएनएन, नागपूर : आगामी गणेशोत्सवाच्या पार्श्वभूमीवर नागपूर महानगरपालिकेने (मनपा) गणेशोत्सव मंडळांसाठी परवानगी प्रक्रिया अधिक सुलभ करण्याचा निर्णय घेतला आहे. यंदापासून गणेशोत्सव मंडळांना आवश्यक असलेली सर्व ना हरकत प्रमाणपत्रे (एनओसी) आणि परवानग्या 'एक खिडकी' प्रणालीद्वारे ऑनलाइन उपलब्ध करून देण्यात येणार आहेत. तसेच विसर्जनावेळी गर्दीचे व्यवस्थापन करण्यासाठी ड्रोन आणि जीपीएस तंत्रज्ञानाचा वापर केला जाणार आहे.
महापौर निता ठाकरे यांच्या अध्यक्षतेखाली गणेशोत्सवाच्या पूर्वतयारीचा आढावा घेण्यासाठी बैठक पार पडली. यावेळी मनपा, नागपूर सुधार प्रन्यास (नासुप्र), पोलीस, वाहतूक विभाग, अग्निशमन विभाग आणि धर्मादाय आयुक्त कार्यालयाचे अधिकारी उपस्थित होते.
महापौर निता ठाकरे यांनी गणेशोत्सव मंडळांना कोणत्याही प्रकारचा त्रास होणार नाही, यासाठी सर्व विभागांनी समन्वयाने काम करण्याच्या सूचना दिल्या. परवानगी प्रक्रिया अधिक पारदर्शक आणि सुलभ करण्यासाठी सर्व आवश्यक मंजुरी एकाच ठिकाणी ऑनलाइन उपलब्ध करून देण्याचे निर्देश त्यांनी दिले.
ड्रोनद्वारे गर्दीवर नियंत्रण
सत्तापक्ष नेते नरेंद्र (बाल्या) बोरकर यांनी विसर्जन स्थळी उंच टॉवर उभारून त्यावरून ड्रोनद्वारे चित्रीकरण करण्याची सूचना केली. हे ड्रोन थेट नियंत्रण कक्षाशी जोडण्यात येणार असून त्यामुळे गर्दीवर प्रभावी नियंत्रण ठेवता येईल. प्रत्येक टॉवरवर पोलीस कर्मचारी तैनात करण्याचाही त्यांनी प्रस्ताव मांडला.
मूर्ती विक्रीसाठी पर्यायी जागांचा प्रस्ताव
पोलीस उपायुक्त रमेश धुमाळ यांनी चिताळ ओळ आणि महाल परिसरात गणेशमूर्ती खरेदीसाठी मोठ्या प्रमाणात गर्दी होत असल्याने शहरातील विविध मैदानांवर मूर्ती विक्रीसाठी जागा उपलब्ध करून दिल्यास वाहतूक कोंडी कमी होईल, असा प्रस्ताव मांडला.
विसर्जन वाहनांवर जीपीएसचा प्रयोग
मनपा आयुक्त डॉ. विपीन यांनी सांगितले की, गेल्या दोन वर्षांपासून गणेशोत्सव मंडळांना ऑनलाइन परवानग्या देण्याची प्रणाली सुरू असून यंदा त्यात आणखी सुधारणा करण्यात आली आहे. वाहतूक, अग्निशमन, विद्युत विभाग आणि धर्मादाय आयुक्त कार्यालयाच्या मंजुऱ्याही एक खिडकी प्रणालीद्वारे उपलब्ध होतील.
याशिवाय, विसर्जन मिरवणुकीतील वाहनांवर जीपीएस प्रणाली बसविण्याचा प्रयोग करण्यात येणार आहे. त्यामुळे विसर्जन मार्गावरील गर्दी आणि वाहतुकीची स्थिती रिअल-टाइममध्ये समजून आवश्यक ते नियोजन करता येईल. नियमित ठिकाणी गणेशोत्सव साजरा करणाऱ्या मंडळांना प्राधान्याने मंजुरी देण्याचाही निर्णय घेण्यात आला आहे.
मनपाच्या प्रमुख व्यवस्था
- गणेश मंडळांसाठी ऑनलाइन परवानगी प्रणाली.
- सर्व झोनमध्ये परवानगीची सुविधा.
- पोलीस, अग्निशमन, वाहतूक विभाग आणि धर्मादाय आयुक्त कार्यालयाची एनओसी एकाच ठिकाणी.
- निर्माल्य संकलनासाठी शहरभर फिरणारे 'निर्माल्य रथ'.
- विसर्जन स्थळी अॅम्ब्युलन्स आणि वैद्यकीय सुविधा.
- शहरातील विविध ठिकाणी कृत्रिम विसर्जन तलाव.
- गोरेवाडा, पोलीस लाईन टाकळी, लकडगंज (कच्छी विसा) आणि कोराडी येथे मोठ्या मूर्तींसाठी विशेष विसर्जन व्यवस्था.
- घरगुती व लहान मूर्तींसाठी मनपाकडून विसर्जन रथाची सुविधा, ज्याचा विशेषतः ज्येष्ठ नागरिकांना लाभ होणार आहे.
हेही वाचा: डॉक्टरांनी संप तातडीने मागे घ्यावा, संपादरम्यान रुग्ण दगावल्यास जबाबदार कोण?; मुंबई हायकोर्टाचे कडक आदेश
