जेएनएन, मुंबई. मनसेप्रमुख राज ठाकरे यांच्या घरच्या बाप्पाच्या दर्शनासाठी शिवसेना पक्षप्रमुख उद्धव ठाकरे हे सहकुटुंब दाखल झाले आहेत. उद्धव हे जवळपास 22 वर्षांच्या कालावधीनंतर राज ठाकरे यांच्या निवासस्थानी दाखल झाले आहेत.
राज ठाकरे यांच्या घरी आज गणपती बाप्पाची प्राणप्रतिष्ठापणा करण्यात आली. त्यानंतर सकाळी 12.30 वाजण्याच्या सुमारास उद्धव ठाकरे शिवतीर्थवर दाखल झाले. उद्धव ठाकरे यांनी राज ठाकरे यांच्या निवासस्थानातील बाप्पाचे मनोभावे दर्शन घेतले. आमदार आदित्य ठाकरे यांनी देखील काकांच्या घरातील बाप्पाचे दर्शन घेतले. रश्मी ठाकरे यांनी देखील बाप्पाचे दर्शन घेतले.
मागील काही दिवसांपूर्वी राज ठाकरे आणि उद्धव ठाकरे हे मराठीच्या मुद्द्यावरुन एक व्यासपीठावर आले होते. तेव्हापासून महाराष्ट्रात उद्धव ठाकरे आणि राज ठाकरे हे एकत्र येणार आणि शिवसेना उद्धव ठाकरे पक्षाची आणि मनसेची युती होणार असा चर्चा सुरु झाल्या होत्या. यातच आता पुन्हा एकदा उद्धव-राज एकत्र आले आहेत.