Shivsena UBT Dasara Melava 2025 : विजयादशमीदिवशी राज्यात अनेक मेळावे पार पडतात मात्र या सर्वात जास्त चर्चा होते ती शिवसेनेच्या दसरा मेळाव्याची. उद्धव ठाकरे यांच्या शिवसेनेचा दसरा मेळावा दरवर्षीप्रमाणे यंदाही मुंबईतील दारार परिसरातील शिवाजी पार्कमध्ये पार पडणार आहे. शिवसेनेचा दसरा मेळावा व त्यातील भाषणे नेहमीच राजकीय वर्तुळात चर्चेचा विषय राहिलेले आहेत. 2022 पासून शिवसेनेत उभी फूट पडल्यानंतरही तसेच पक्ष नाव आणि चिन्ह गमावल्यानंतरही उद्धव ठाकरेंच्या दसरा मेळाव्याचं महत्त्व तसूभरही कमी झालंले नाही. आगामी महापालिका निवडणुका व राज ठाकरेंच्या जवळिकीनंतर पहिल्यांदाच होणार ठाकरेंचा दसरा मेळावा विशेष असणार आहे.

दरम्यान यंदाच्या दसरा मेळाव्याचं बजेट तब्बल 63 कोटी रुपये असल्याचा दावा भारतीय जनता पक्षाने केला आहे. भाजपाचे प्रवक्ते केशव उपाध्ये यांनी यासंदर्भात एक्सवर एक पोस्ट करत दावा केला आहे की, उद्धव ठाकरे व त्यांच्या पक्षासाठी 9 हा अंक लाभदायक असल्याचं त्यांना कुणीतरी सांगितलं आहे, तेव्हापासून ते 9 अंकावर अवलंबून असतात. त्यामुळे त्यांच्या दसरा मेळाव्याचं बजेटही 9 अंकावर आधारित आहे. ठाकरेंच्या दसरा मेळाव्यासाठी 63 कोटी (6 + 3 = 9) इतकं बजेट असल्याचा दावाही उपाध्ये यांनी केला आहे.

केशव उपाध्ये यांनी काय म्हटलं आहे..

63 कोटीचा दसरा मेळावा

नऊ हा ‘आकडा’ लाभदायक असल्याचे कुणीतरी सांगितल्यापासून उबाठाचे सगळे व्यवहार या आकड्यांवर अवलंबून असतात. निवडणुकीतील उमेदवारांच्या संख्येची बेरीज नऊ हवी, टक्केवारी नऊपेक्षा कमी नसावी, इतकेच काय, दोघा भावांमध्ये असलेल्या 36 च्या आकड्याची बेरीजही नऊ असावी याची नेहमीच काळजी घेणाऱ्या या गटाचा दसरा मेळाव्याचे नियोजनही 63 कोटींच्या घरात असणार आहे. गटाच्या गोटातील सूत्रांनी दिलेली ही अत्यंत खात्रीलायक माहिती!!

मेळाव्यासाठी तब्बल 63 कोटीचे नियोजन झाल्याचे या गटातील नेत्यानेच हर्षोल्हासित होत सांगितले.

    सभा ठिकाण, स्टेज सजावट, जाहिराती, सोशल मिडीया, त्याशिवाय लोकांना आणायला गाड्या, गाडीत बसून लोकांनी मेळाव्याला यावे म्हणून, शिवाय त्यांच्या वडापाव, चहापाण्याची व्यवस्था……. असं सगळं मिळून हे 63 कोटी लागणार आहेत म्हणे.

    या 63 कोटी मध्ये अतीवृष्टीच्या संकटात सापडलेल्या मराठवाड्यात किती गावातील शेतकऱ्यांना मदत झाली असती? किती घरे वसवली गेली असती?

    शिवसेनाप्रमुख बाळासाहेब ठाकरे असताना लोक स्वतःहून उत्साहात यायचे. तेव्हा सेना प्रमुखाचं विचारांच सोनं असायच. आता तशी परिस्थिती नाही! मागचे काही मेळावे आठवा… मिंधे, खंजीर, माझा पक्ष चोरला, चिन्ह चोरलं ही रडगाणी ऐकायला एकट्या गटातून गर्दी पण गोळा होत नाही म्हणून 36 चा आकडा मोडून 63 ची गोळाबेरीज करण्याचा हा आटापीटा!!

    नाकी नऊ आले म्हणतात ते हेच!! रडगाण्याचे तेच बेसूर सूर आळवायला खरंच 63 कोटीचा मेळावा घ्यायची गरज आहे का? हवं तर उद्धव ठाकरेंच्या नावाने मराठवाड्यात मदत करा पण हे 63 कोटी महाराष्ट्राच्याच उभारणीत लावा, असं केशव उपाध्ये यांनी म्हटलं आहे.