मुंबई. Rohit Pawar : दिवंगत उपमुख्यमंत्री अजित पवार यांच्या विमान अपघात प्रकरणावरून राजकीय चर्चेला पुन्हा उधाण आले आहे. राष्ट्रवादी काँग्रेसच्या शरदचंद्र पवार पक्षाचे आमदार रोहित पवार यांनी अजित पवार यांच्या संदर्भातील आपली पत्रकार परिषद पुढे ढकलली असून, आता 10 ऑक्टोबर रोजी सकाळी 11 वाजता पत्रकार परिषद घेणार असल्याचे जाहीर केले आहे. या पत्रकार परिषदेत काही ‘मफलरीं’चे खुलासे करणार असल्याचे त्यांनी म्हटले आहे. त्यामुळे या ‘मफलरमागील नाव’ नेमके कोणाचे, याबाबत राजकीय वर्तुळात चर्चा सुरू झाली आहे.

रोहित पवार यांनी आजच्या पत्रकार परिषदेऐवजी 10 ऑक्टोबरची तारीख जाहीर केली. देशातील निवडणूक आयोगाशी संबंधित घडामोडी तसेच महाराष्ट्रातील दुष्काळी परिस्थितीच्या पार्श्वभूमीवर पत्रकार परिषद पुढे ढकलत असल्याचे त्यांनी सांगितले. त्याचवेळी अजित पवार यांच्यासाठीचा आपला लढा थांबलेला नसल्याचेही त्यांनी म्हटले आहे.

‘मफलर’मागे कोण?

रोहित पवार यांनी सोशल मीडिया पोस्टमधून 10 ऑक्टोबरला काही ‘मफलरीं’चे खुलासे करणार असल्याचे म्हटले आहे. त्यामुळे त्यांच्या या वक्तव्याचा रोख नेमका कोणत्या व्यक्ती किंवा व्यक्तींकडे आहे, याबाबत तर्क-वितर्कांना सुरुवात झाली आहे. मात्र, रोहित पवार यांनी अद्याप संबंधित व्यक्तीचे नाव अधिकृतपणे जाहीर केलेले नाही. त्यामुळे सध्या कोणत्याही नेत्याचे नाव या प्रकरणाशी जोडणे हे केवळ अंदाजावर आधारित ठरेल.

यापूर्वीही रोहित पवारांकडून घातपाताचा दावा

अजित पवार यांच्या विमान अपघातानंतर रोहित पवार यांनी यापूर्वी पत्रकार परिषद घेत विमान अपघाताच्या परिस्थितीवर अनेक प्रश्न उपस्थित केले होते. त्यांनी हा अपघात घातपात असू शकतो, अशी शंका व्यक्त केली होती. विमान, वैमानिक, विमानाची देखभाल, प्रवासाचे नियोजन आणि अपघाताच्या दिवशीच्या घटनाक्रमाबाबत त्यांनी प्रश्न उपस्थित केले होते.

    फेब्रुवारीमध्ये घेतलेल्या पत्रकार परिषदेत रोहित पवारांनी सुमारे 50 स्लाइडचे सादरीकरण करत अजित पवार यांच्या शेवटच्या प्रवासाचा घटनाक्रम मांडला होता. विमानाच्या स्थितीपासून वैमानिकाच्या नियुक्तीपर्यंत विविध मुद्द्यांवर त्यांनी प्रश्न उपस्थित केले होते.

    बड्या नेत्याच्या भेटीचा उल्लेख

    याच पत्रकार परिषदेत रोहित पवारांनी अजित पवार मुंबईहून बारामतीला जाण्यापूर्वी एका बड्या नेत्यासोबत त्यांची भेट झाल्याचा दावा केला होता. या भेटीमुळे अजित पवारांच्या प्रवासाच्या वेळापत्रकात बदल झाला, असा घटनाक्रमही त्यांनी मांडला होता. मात्र, या दाव्यांबाबत अधिकृत तपासातून अंतिम निष्कर्ष समोर आलेला नाही.