जेएनएन, मुंबई. NCP Merger: महाराष्ट्राच्या राजकारणात सध्या राष्ट्रवादी काँग्रेसच्या दोन्ही गटांच्या संभाव्य विलिनीकरणाची चर्चा जोरात सुरू आहे. दिवंगत उपमुख्यमंत्री अजित पवार यांच्या राष्ट्रवादी काँग्रेसचा आणि ज्येष्ठ नेते शरद पवार यांच्या राष्ट्रवादी काँग्रेसचा पक्ष पुन्हा एकत्र येणार का, याकडे राजकीय वर्तुळाचे लक्ष लागले आहे. दोन्ही पक्षांतील वरिष्ठ नेत्यांच्या बैठका, चर्चा आणि राजकीय हालचालींमुळे विलिनीकरणाच्या चर्चेला वेग आला असतानाच आता सुनेत्रा पवार यांच्या भूमिकेबाबत महत्त्वाची माहिती समोर आली आहे.
दोन्ही राष्ट्रवादी काँग्रेस पक्षांचे विलिनीकरण झाल्यास भविष्यात आपल्या पक्षाच्या अस्तित्वाचा प्रश्न निर्माण होऊ शकतो, अशी भूमिका सुनेत्रा पवार यांच्या वतीने मांडण्यात आल्याची माहिती समोर आली आहे. त्यामुळे सध्याच्या परिस्थितीत दोन्ही राष्ट्रवादी काँग्रेस पक्ष एकत्र येण्यास त्यांची मान्यता नसल्याची माहिती आहे. पक्षाचे स्वतंत्र राजकीय अस्तित्व कायम ठेवण्याच्या दृष्टीने ही भूमिका महत्त्वाची मानली जात आहे.
मात्र, या भूमिकेमध्ये एक महत्त्वाचा राजकीय पर्यायही सुचवण्यात आल्याचे समजते. शरद पवार यांच्या नेतृत्वाखालील दुसऱ्या राष्ट्रवादी काँग्रेसबाबत वेगळा विचार करायचा असेल, तर त्याला सुनेत्रा पवार यांचा विरोध नसणार आहे, असे त्यांच्या वतीने कळवण्यात आल्याची माहिती समोर आली आहे. विशेष म्हणजे, दुसऱ्या राष्ट्रवादी काँग्रेसने स्वतंत्र पक्ष म्हणून महायुतीमध्ये सहभागी होण्याचा निर्णय घेतला, तर त्यालाही आपला विरोध नसल्याचे संकेत देण्यात आल्याचे सांगितले जात आहे.
यामुळे दोन्ही पक्षांचे औपचारिक विलिनीकरण करण्याऐवजी स्वतंत्र अस्तित्व कायम ठेवून राजकीय आघाडी करण्याचा पर्याय पुढे येऊ शकतो. दोन्ही पक्ष एकत्र आल्यास नेतृत्व, पक्षसंघटना, पदाधिकारी आणि आमदारांचे राजकीय भवितव्य याबाबत अनेक प्रश्न निर्माण होऊ शकतात. तसेच विलिनीकरणानंतर पक्षाचे नेतृत्व कोणाकडे राहणार आणि संघटनेवरील नियंत्रण कसे असेल, याबाबतही अनिश्चितता आहे. या पार्श्वभूमीवर सुनेत्रा पवार यांच्या भूमिकेला महत्त्व प्राप्त झाले आहे.
दरम्यान, राष्ट्रवादी काँग्रेसच्या दोन्ही गटांमध्ये विलिनीकरणाबाबत चर्चा सुरू असल्याच्या पार्श्वभूमीवर पक्षातील अनेक नेत्यांच्या वेगवेगळ्या भूमिका समोर येत आहेत. ज्येष्ठ नेते छगन भुजबळ यांनीही १३ नोव्हेंबर रोजी विलिनीकरणाबाबत अद्याप कोणताही अंतिम निर्णय झालेला नसून चर्चा प्राथमिक टप्प्यात असल्याचे स्पष्ट केले. दोन्ही पक्ष वेगवेगळ्या राजकीय आघाड्यांमध्ये असल्याने संबंधित मित्रपक्षांची संमती घेणेही आवश्यक असल्याचे त्यांनी म्हटले आहे.
दुसरीकडे, शरद पवार गटाच्या खासदार सुप्रिया सुळे यांनीही विलिनीकरणाचा कोणताही प्रस्ताव आपल्याकडे आलेला नसल्याची माहिती समोर आली आहे.
