मुंबई: ऐरोली येथील नवी मुंबई महानगरपालिकेच्या राजमाता जिजाऊ रुग्णालयात वैद्यकीय निष्काळजीपणामुळे प्रसवपूर्व इंजेक्शन दिल्यानंतर एका 23 वर्षीय गर्भवती महिलेचा आणि तिच्या गर्भातील बाळाचा मृत्यू झाला. ही घटना 1 जुलै रोजी घडली. सोनम डोंगरे असे मृत महिलेचे नाव होते व ती 8 महिन्यांची गर्भवती होती.
1 जुलै रोजी ऐरोली रुग्णालयात सोनम ही एकमेव गंभीर रुग्ण नव्हती. रिचा मिश्रा नावाच्या आणखी एका आठ महिन्यांच्या गर्भवती महिलेलाही प्रसूतीपूर्व दोन इंजेक्शन्स देण्यात आल्या होत्या. त्यानंतर तिची प्रकृती इतकी खालावली की तिला व्हेंटिलेटर सपोर्टसाठी वाशी येथील फोर्टिस रुग्णालयात हलवावे लागले. मात्र, आता मिश्रा यांच्या प्रकृतीत सुधारणा होत असल्याचे वृत्त आहे.
कुटुंबातील सदस्यांचा निष्काळजीपणाचा आरोप
सोनमचे पती, करण डोंगरे यांनी पत्रकारांना सांगितले की, ऐरोली रुग्णालयातील कर्मचाऱ्यांच्या निष्काळजीपणामुळे त्यांच्या पत्नीचा आणि गर्भातील बाळाचा मृत्यू झाला. त्यांनी असा आरोप केला की, इंजेक्शन दिल्यानंतर सोनमची प्रकृती खालावली असतानाही, कर्तव्यावर असलेल्या डॉक्टरांनी आणि नर्सिंग स्टाफने त्यांच्या पत्नीला तीन तास ऐरोली रुग्णालयातच ठेवले.
करण म्हणाले की, बुधवारी त्याच्या पत्नीला वाशी येथील NMMC रुग्णालयात हलवेपर्यंत त्याला तिच्या परिस्थितीबद्दल काहीच माहिती नव्हती. वाशी रुग्णालयात पुढील उपचारादरम्यान सोनमचा मृत्यू झाला.
रुग्णालयाने काय सांगितले?
एनएमएमसीचे आरोग्य वैद्यकीय अधिकारी डॉ. राजेश म्हात्रे यांनी सांगितले की, सोनम डोंगरे नावाची रुग्ण ३० जून रोजी ऐरोली येथील एनएमएमसी रुग्णालयात गरोदरपणाच्या आठव्या महिन्यात पोटात दुखत असल्याची तक्रार घेऊन आली होती. प्री-मॅच्योर प्रसूतीच्या शक्यतेमुळे तिला दाखल करण्यात आले होते.
डॉ. म्हात्रे यांनी स्पष्ट केले की, 1 जुलै रोजी दुपारी 3 वाजण्याच्या सुमारास सोनमला डेक्सामेथासोनचे इंजेक्शन देण्यात आले. हे इंजेक्शन बाळाच्या फुफ्फुसांच्या विकासास मदत करण्यासाठी आणि प्री-मॅच्योर जन्मामध्ये श्वसनाच्या समस्यांचा धोका कमी करण्यासाठी दिले जाते. पण त्यानंतर लगेचच तिची प्रकृती खालावली आणि ती बेशुद्ध झाली.
