मुंबई. Mumbai Rain Update: मुंबई आणि उपनगरांमध्ये मंगळवारी रात्रीपासून सुरू झालेल्या पावसाची संततधार बुधवारीही कायम असून शहरातील अनेक भाग जलमय झाले आहेत. रात्री उशिरापासून ते पहाटेपर्यंत झालेल्या मुसळधार पावसामुळे सखल भागांमध्ये मोठ्या प्रमाणात पाणी साचले आहे. यामुळे वाहतुकीवर परिणाम झाला असून नागरिकांना मोठ्या गैरसोयींचा सामना करावा लागत आहे.
साकीनाका, वांद्रे, शीव, अंधेरी पश्चिम आणि बोरीवली पूर्व या भागांमध्ये अनेक रस्त्यांवर पाणी साचल्याचे चित्र पाहायला मिळाले. काही ठिकाणी रस्त्यांचे स्वरूप लहान तलावासारखे झाले असून वाहनांची वाहतूक मंदावली आहे. पावसाचा जोर कायम असल्याने साचलेल्या पाण्याचा निचरा होण्यास अडथळा निर्माण झाला आहे.
मुसळधार पावसामुळे अनेक वाहनचालकांना फटका बसला आहे. साचलेल्या पाण्यातून मार्ग काढताना अनेक गाड्या बंद पडल्याच्या घटना समोर आल्या आहेत. त्यामुळे काही रस्त्यांवर वाहतूक कोंडी निर्माण झाली. कार्यालयीन वेळेत नागरिकांना मोठ्या प्रमाणात अडचणींचा सामना करावा लागू शकतो, अशी शक्यता व्यक्त केली जात आहे.
महापालिका यंत्रणा अलर्ट मोडवर -
मुंबई महानगरपालिका आणि संबंधित यंत्रणा परिस्थितीवर लक्ष ठेवून आहेत. पाणी साचलेल्या भागांमध्ये पंपांच्या साहाय्याने पाण्याचा निचरा करण्याचे काम सुरू करण्यात आले आहे. तसेच नागरिकांनी आवश्यक कामाशिवाय घराबाहेर पडू नये आणि वाहतूक विभागाच्या सूचनांचे पालन करावे, असे आवाहन प्रशासनाकडून करण्यात आले आहे.
हवामान विभागानेही मुंबई आणि उपनगरांमध्ये दिवसभर जोरदार ते अतिजोरदार पावसाचा अंदाज वर्तवला आहे. समुद्रात भरतीच्या काळात सखल भागांमध्ये पाणी साचण्याची शक्यता असल्याने नागरिकांना सतर्क राहण्याचा इशारा देण्यात आला आहे.
दरम्यान, सततच्या पावसामुळे रेल्वे आणि रस्ते वाहतुकीवर परिणाम होण्याची भीती व्यक्त केली जात आहे. शाळा, महाविद्यालये आणि कार्यालयांकडे जाणाऱ्या नागरिकांनी प्रवासापूर्वी वाहतूक व हवामानविषयक अद्ययावत माहिती तपासूनच घराबाहेर पडावे, असे आवाहन करण्यात आले आहे.
मुंबईत पावसाचा जोर कायम राहिल्यास पुढील काही तास शहरातील परिस्थिती आणखी गंभीर होण्याची शक्यता असून प्रशासन आणि आपत्कालीन यंत्रणा सज्ज ठेवण्यात आले आहेत.
