मुंबई. Mumbai lake levels: मुंबईकरांसाठी पाण्याबाबत महत्त्वाची बातमी आहे. मुंबईला पाणीपुरवठा करणाऱ्या सातही प्रमुख तलावांमध्ये पाणीसाठा मोठ्या प्रमाणात वाढला असला, तरी मुंबई महानगरपालिका प्रशासनाने लागू केलेली 10 टक्के पाणीकपात तूर्तास कायम ठेवण्याचा निर्णय घेतला आहे. पाणीसाठा जवळपास 97.51 टक्क्यांवर पोहोचला असला तरी धरणांमध्ये अद्याप 35 हजार 990 दशलक्ष लिटर पाण्याची तूट असल्याने प्रशासनाकडून पाणीवापराबाबत सावध भूमिका घेण्यात आली आहे.

पालिकेच्या हायड्रॉलिक इंजिनिअर विभागाच्या आकडेवारीनुसार, 16 सप्टेंबर रोजी सकाळी 6 वाजता मुंबईला पाणीपुरवठा करणाऱ्या सात तलावांमध्ये एकूण 14 लाख 11 हजार 373 दशलक्ष लिटर पाणीसाठा उपलब्ध होता. या सात तलावांची एकूण उपयुक्त जलसाठा क्षमता सुमारे 14 लाख 47 हजार 363 दशलक्ष लिटर आहे. त्यामुळे सध्याचा साठा क्षमतेच्या सुमारे 97.51 टक्के इतका आहे. 

गेल्या वर्षाच्या तुलनेत यंदा साठा कमी

यंदाचा पाणीसाठा जवळपास पूर्ण क्षमतेवर असला, तरी मागील वर्षाच्या तुलनेत तो काहीसा कमी आहे. 16 सप्टेंबर 2025 रोजी सात तलावांमध्ये 14 लाख 3 हजार ३४५ दशलक्ष लिटर, म्हणजेच 98.82 टक्के पाणीसाठा होता. तर २०२४ मध्ये याच कालावधीत 14 लाख 28 हजार 697 दशलक्ष लिटर, म्हणजे 98.71 टक्के साठा होता. त्यामुळे यंदा तलाव जवळपास भरलेले असले तरी मागील दोन वर्षांच्या तुलनेत पाणीसाठ्यात काहीशी तूट आहे. 

पावसामुळे तलावांच्या पातळीत वाढ

मुंबईला पाणीपुरवठा करणाऱ्या तलावांच्या पाणलोट क्षेत्रात गेल्या काही दिवसांत पाऊस झाल्याने पाणीसाठ्यात वेगाने वाढ झाली आहे. भातसा धरणाच्या पाणीसाठ्यातही मोठी वाढ झाली असून सातही जलाशयांतील स्थिती सुधारली आहे. 

    मात्र, साठा जवळपास 98 टक्क्यांवर पोहोचला असतानाही पाणीकपात तातडीने मागे न घेण्यामागे आगामी काळातील पावसाची अनिश्चितता हा महत्त्वाचा मुद्दा आहे. यापूर्वीही पालिका प्रशासनाने तलाव पूर्ण क्षमतेने भरल्यानंतर आणि पावसाचा सातत्यपूर्ण अंदाज स्पष्ट झाल्यानंतरच पाणीकपातीबाबत निर्णय घेण्याची भूमिका घेतली होती. सप्टेंबरअखेरपर्यंत 10 टक्के कपात कायम ठेवण्याचा निर्णय यापूर्वीही समोर आला होता. 

    मुंबईकरांना पाणी जपून वापरण्याचे आवाहन

    सातही तलावांमध्ये मोठ्या प्रमाणात पाणीसाठा उपलब्ध असला, तरी मुंबईची दररोजची पाण्याची गरज मोठी आहे. त्यामुळे आगामी काळात पावसाचा जोर कमी झाल्यास साठ्यावर पुन्हा परिणाम होऊ शकतो. याच पार्श्वभूमीवर प्रशासनाने सध्या पाणीकपात कायम ठेवत नागरिकांनी पाण्याचा काटकसरीने वापर करण्याचे आवाहन केले आहे.

    यंदाच्या पावसाळ्यात राज्यातही पावसाचे वितरण असमान राहिले आहे. सप्टेंबरच्या पहिल्या 11 दिवसांत राज्यात सरासरीपेक्षा 17 टक्के कमी पाऊस नोंदवला गेला होता. त्यामुळे मुंबईतील तलावांमध्ये साठा वाढला असला, तरी संपूर्ण जलव्यवस्थेच्या दृष्टीने प्रशासनाकडून खबरदारी घेतली जात आहे.