जेएनएन, मुंबई. Mumbai Rain : आठवडाभराच्या विश्रांतीनंतर मुंबई, उपनगरे व राज्यातील बहुतांशी भागात पावसाने पुन्हा जोर धरला आहे. बुधवारपासून राज्यात पाऊस पुन्हा सक्रीय झाला आहे. विशेषतः कोकण, मुंबई आणि उपनगर भागात गुरुवार पहाटेपासूनच मध्यम ते जोरदार स्वरूपाचा पाऊस पडत आहे. मुंबईतील काही ठिकाणी मुसळधार पावसामुळे रस्त्यांवर पाणी साचले असून अनेक ठिकाणी रस्ते वाहतूक व लोकल सेवेवर परिणाम दिसून येत आहे.
मुंबईत पहाटेपासून मुसळधार -
काही दिवसाच्या विश्रांतीनंतर मुंबईच्या पश्चिम उपनगरात आज पहाटेपासून जोरदार पावसाला सुरुवात झाली आहे. मुंबईत (Mumbai Rain) गुरुवारी मध्यरात्रीपासून जोरदार पाऊस कोसळत असून पुढील तीन ते चार तास मुंबईच्या काही भागांमध्ये मध्यम ते मुसळधार पाऊस पडण्याची शक्यता हवामान खात्याने वर्तवली आहे.
मध्य व पश्चिम मार्गावरील लोकल विलंबाने -
पश्चिम उपनगरात अंधेरी, जोगेश्वरी, गोरेगाव, मालाड, कांदिवली, बोरिवली, दहिसर, विलेपार्ले, सांताक्रुज,वांद्रे आदि परिसरांमध्ये पहाटेपासून जोरदार पाऊस पडत आहे. पावसामुळे मध्य (Central Railway) आणि पश्चिम रेल्वेच्या (Western Railway) दोन्ही मार्गावरील लोकल सेवा काही 15 ते 20 मिनिटांच्या विलंबाने सुरु आहे.
महाराष्ट्रातील पावसाचे चित्र!
कोकण व मुंबई – सकाळपासून अधूनमधून जोरदार पाऊस पडत आहे.
पश्चिम महाराष्ट्र व विदर्भ – काही भागात मुसळधार, तर काही ठिकाणी ढगाळ वातावरण असून पाऊस पडत आहे.
मराठवाडा – अनेक ठिकाणी हलका ते मध्यम पाऊस स्वरूपाचा पाऊस पडत आहे.
बुधवारपासून महाराष्ट्रातील अनेक जिल्ह्यांत मुसळधार पाऊस पडत आहे. तर काही भागांत पूर्ण दिवस ढगाळ हवामान पाहायला मिळाले आहे.
हवामान खात्याचा अंदाज!
भारतीय हवामान विभागानुसार, शुक्रवारपासून पुढील 3-4 दिवस पावसाचा जोर अधिक वाढणार आहे. लाँग वीकेंडमध्ये शनिवार-रविवार व सार्वजनिक सुट्यामध्ये राज्यभर पावसाचे प्रमाण जास्त असल्याचा अंदाज आहे.
हवामान विभागाचा इशारा-
काही किनारी भागात मुसळधार पावसाचा इशारा दिला आहे.तर काही अंतर्गत भागात वीजांसह पावस पडणार असल्याचा अंदाज वर्तवण्यात आला आहे.