जेएनएन, मुंबई. Mumbai News: रेडीओ क्लब येथील प्रवासी जेट्टी, टर्मिनल इमारतीचे भूमीपुजन आज बंदरे मंत्री नितेश राणे यांच्या हस्ते करण्यात आले.
गेट वे ऑफ इंडिया येथील जेट्टीवरील ताण कमी होणार
जेट्टी बाबत स्थानिकांनी उपस्थित केलेल्या शंकांचे निरसनही यावेळी मंत्री नितेश राणे यांनी केले. गेट वे ऑफ इंडिया येथील अस्तित्वातील जेट्टीवरील सुविधा प्रवाशांकरीता अपुरी पडत असल्याने वृद्ध व्यक्ती, स्त्रीया व लहान मुले यांना अडचणी निर्माण होतात. या प्रस्तावित जेट्टीमुळे गेट वे ऑफ इंडिया येथील जेट्टीवरील ताण कमी होण्यास मदत होणार आहे.
रेडिओ कल्ब भागातील वर्दळ वाढेल
रेडीओ क्लब येथील जेट्टीमुळे समुद्रातील बोटींसाठी नवा मार्ग किंवा उतरण्याची जागा मिळणार आहे. यातून रेडिओ कल्ब भागातील वर्दळ वाढेल तसंच गेट वे ऑफ इंडिया भागातील अतिरिक्त बोटी ह्या रेडीओ क्लब जेट्टी भागात उभ्या करण्यात मदत होईल. त्यातून गेट वे ऑफ इंडिया जेट्टीवर मोठा ताण कमी होईल.
अशी असणार जेट्टी
टर्मिनल इमारत 80 मीटर बाय 80 मीटर, 350 लोकांची क्षमता असलेले ॲम्पीथिएटर, बर्थिग जेट्टी, अप्रोज जेट्टी, अग्नीसुरक्षा प्रणाली, सीसीटीव्ही यंत्रणा, गार्डनिंग व सुशोभीकरण अशा विविध सुविधांयुक्त ही जेट्टी असणार आहे. या कामाच्या ठिकाणी भु – गर्भ चाचणी करण्यात आली आहे, असंही अधिकाऱ्यांनी सांगितलं.
याप्रसंगी महाराष्ट्र मेरीटाईम बोर्डाचे मुख्य कार्यकारी अधिकारी पी. प्रदीप, मुख्य अभियंता सुरेंद्र टोपले, वरीष्ठ प्रशासकीय अधिकारी प्रदीप बढीये, अधिक्षक अभियंता सुधीर देवरे आदी उपस्थित होते.