नवी मुंबई. Mumbai Metro Line 12 A: मुंबई महानगर प्रदेशातील वाहतूक व्यवस्था अधिक सक्षम करण्यासाठी मानपाडा-काटई नाका ते तळोजा (कल्याण फाटा मार्गे) या 18.40 किलोमीटर लांबीच्या मुंबई मेट्रो मार्गिका 12-अ प्रकल्पाला मंत्रिमंडळाच्या पायाभूत सुविधा समितीने मंजुरी दिली आहे. सुमारे 13 हजार 856.37 कोटी रुपये खर्चाच्या या प्रकल्पाचे काम पुढील साडेतीन वर्षांत पूर्ण करण्याचे निर्देश मुख्यमंत्री देवेंद्र फडणवीस यांनी दिले आहेत. या मार्गावर 12 उन्नत मेट्रो स्थानके उभारण्यात येणार असून, मेट्रो मार्गिकेसोबत एकात्मिक उड्डाणपुलांचीही उभारणी केली जाणार आहे.

मंत्रालयात मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ पायाभूत सुविधा समितीच्या बैठकीत या प्रकल्पाला मंजुरी देण्यात आली. बैठकीला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, महसूल मंत्री चंद्रशेखर बावनकुळे यांच्यासह वरिष्ठ अधिकारी उपस्थित होते. मुंबई महानगर प्रदेशातील वाढती लोकसंख्या, वाहनांची संख्या आणि शहरांदरम्यान होणारी दैनंदिन वाहतूक लक्षात घेता या प्रकल्पाला महत्त्व प्राप्त झाले आहे.

12 उन्नत स्थानके, मेट्रोसोबत उड्डाणपूल

मेट्रो मार्गिका 12-अ ही संपूर्णपणे उन्नत असणार आहे. या 18.40 किलोमीटरच्या मार्गावर 12 स्थानके प्रस्तावित आहेत. प्रकल्पात 6.93 किलोमीटर लांबीचा चारपदरी एकात्मिक उड्डाणपूल, तसेच 8.69 किलोमीटर लांबीचा सहापदरी उड्डाणपूल उभारण्याचे नियोजन आहे. मेट्रो आणि उन्नत रस्ते यांची एकत्रित उभारणी केल्यामुळे या परिसरातील वाहतुकीची क्षमता वाढण्यास मदत होणार आहे. 

या मार्गावरील प्रस्तावित स्थानके पुढीलप्रमाणे आहेत :

* मानपाडा

    * काटई नाका

    * ग्रोथ सेंटर

    * देसाई नाका

    * पडले गाव

    * कल्याण फाटा

    * गोठेघर गाव

    * दहिसर मोरी

    * दहिसर गाव

    * किरवली गाव

    * रोहिंजण

    * खुटारी गाव

    मेट्रोच्या अन्य मार्गांशी जोडणी

    मेट्रो मार्गिका 12-अ मुळे कल्याण-डोंबिवली आणि नवी मुंबईदरम्यानची कनेक्टिव्हिटी अधिक सक्षम होण्याची अपेक्षा आहे. काटई नाका येथे मेट्रो मार्गिका 12 आणि बुलेट ट्रेनच्या जोडमार्गाशी संपर्क प्रस्तावित आहे. काटई नाका ते कल्याण फाटा या भागात मेट्रो मार्गिका 14 C, तर अमनदूत स्थानकावर नवी मुंबई मेट्रो मार्गिका 1 C जोडणी नियोजित आहे. त्यामुळे प्रवाशांना विविध मेट्रो मार्गांदरम्यान प्रवास करणे सोयीचे होऊ शकते.

    दररोज 4.74 लाख प्रवाशांना फायदा होण्याचा अंदाज

    या मेट्रो मार्गिकेवरून दररोज सुमारे 4 लाख 74 हजार प्रवासी प्रवास करतील, असा अंदाज व्यक्त करण्यात आला आहे. रस्ते वाहतुकीच्या तुलनेत प्रवासाचा वेळ 40 ते 50 टक्क्यांपर्यंत कमी होण्याची अपेक्षा आहे. यामुळे कल्याण, डोंबिवली, शिळफाटा, मानपाडा, कल्याण फाटा आणि तळोजा परिसरातील प्रवाशांना दिलासा मिळू शकतो. मात्र, प्रत्यक्ष प्रवासाच्या वेळेतील बचत ही मार्गिका सुरू झाल्यानंतरच्या वाहतूक परिस्थितीवर अवलंबून असणार आहे.