जेएनएन, मुंबई. गेल्या काही महिन्यांपासून महाराष्ट्राच्या राजकीय वर्तुळात राष्ट्रवादी काँग्रेसचे अध्यक्ष शरद पवार यांच्या राजकीय भूमिकेबाबत विविध चर्चा सुरू होते. शरद पवारांचा पक्ष भाजपप्रणित राष्ट्रीय लोकशाही आघाडी NDA सोबत जाणार असल्याची शक्यता व्यक्त केली जात होती. पंतप्रधान नरेंद्र मोदी आणि शरद पवार यांच्यात झालेल्या भेटीनंतर या चर्चांना आणखी वेग आला होता. मात्र, सोमवारी मुंबईत झालेल्या राष्ट्रवादी काँग्रेस शरदचंद्र पवार पक्षाच्या मेळाव्यात शरद पवार यांनी या चर्चांवर स्पष्ट भूमिका मांडली.
चर्चांवर शरद पवार म्हणाले…
शरद पवार यांनी आपण कुठेही आणि कुणासोबतही जाणार नसल्याचे स्पष्ट करत NDA सोबत जाण्याच्या शक्यतेला नकार दिला. “आपल्याबाबत वेगवेगळ्या चर्चा सुरू आहेत. मला त्यांना सांगायचं आहे, आपण कुठेही जाणार नाही. आम्ही कुणासोबत जाणार नाही. यायचं असेल तर आमच्यासोबत या,” असे शरद पवार यांनी सांगितले.
पवार यांच्या वक्तव्यामुळे गेल्या काही महिन्यांपासून सुरू असलेल्या राजकीय चर्चांना मोठा धक्का बसला आहे. विशेष म्हणजे, शरद पवार यांनी हे वक्तव्य करताना कोणाचेही थेट नाव घेतले नाही. मात्र, त्यांच्या वक्तव्याचा रोख अजित पवार यांच्या नेतृत्वाखालील राष्ट्रवादी काँग्रेसकडे आणि सध्या राज्य सरकारमध्ये उपमुख्यमंत्री असलेल्या सुनेत्रा पवार यांच्याकडे असल्याची राजकीय चर्चा सुरू झाली आहे.
‘आमच्यासोबत या’ म्हणत अप्रत्यक्ष संदेश
अजित पवार यांच्या निधनानंतर राष्ट्रवादी काँग्रेसच्या अजित पवार गटाची धुरा सुनेत्रा पवार यांच्याकडे आली आहे. त्या सध्या महाराष्ट्राच्या उपमुख्यमंत्री असून राष्ट्रवादी काँग्रेसच्या राष्ट्रीय अध्यक्षपदाची जबाबदारीही त्यांच्याकडे आहे.
अशा पार्श्वभूमीवर शरद पवार यांनी “यायचं असेल तर आमच्यासोबत या” असे म्हटल्याने त्यांच्या वक्तव्याची राजकीय चर्चा अधिक रंगली आहे. मात्र, हे वक्तव्य नेमके कोणाला उद्देशून होते, हे शरद पवार यांनी स्पष्ट केलेले नाही. त्यामुळे या वक्तव्याचे वेगवेगळे राजकीय अर्थ काढले जात आहेत.
NDA सोबत जाण्याच्या चर्चांना पूर्णविराम?
शरद पवार यांच्या NDA प्रवेशाबाबत गेल्या काही काळात राजकीय वर्तुळात अनेक तर्क-वितर्क व्यक्त होत होते. जुलैमध्येही शरद पवारांच्या राष्ट्रवादी काँग्रेसच्या NDA सोबत जाण्याबाबत चर्चा झाली होती. मात्र त्यावेळी कोणताही अधिकृत निर्णय झालेला नसल्याचे वृत्त होते.
आता मुंबईतील कार्यक्रमात शरद पवारांनी केलेल्या स्पष्ट वक्तव्यामुळे किमान त्यांच्या पक्षाच्या सध्याच्या भूमिकेबाबत चित्र स्पष्ट झाले आहे. म्हणजेच, NDA मध्ये जाण्याचा निर्णय घेतलेला नाही आणि पक्ष स्वतंत्रपणे आपल्या विद्यमान राजकीय आघाडीच्या भूमिकेत राहणार असल्याचा संदेश त्यांच्या वक्तव्यातून देण्यात आला आहे.
