जेएनएन, मुंबई: राज्यातील मराठी माध्यमाच्या (Marathi medium schools) सुमारे 600 शाळांवर बंद होण्याची शक्यता निर्माण झाली आहे. शिक्षण विभागाच्या शिक्षक समायोजन प्रक्रियेविरोधात महाराष्ट्र राज्य माध्यमिक व उच्च माध्यमिक शाळा (Maharashtra State Secondary and Higher Secondary School) मुख्याध्यापक संघ महामंडळाने गंभीर चिंता व्यक्त केली आहे.
अनेक शाळा शिक्षकविहीन होतील
राज्यातील शिक्षक संख्या आणि विद्यार्थ्यांच्या प्रमाणावर आधारित समायोजनाची अंमलबजावणी केली जात आहे. तर अनेक शाळा शिक्षकविहीन होतील, ज्याचा परिणाम थेट मराठी माध्यमाच्या अस्तित्वावर होईल, असे संघटनांचे म्हणणे आहे.
शिक्षणमंत्र्यांकडे निवेदन सादर
मुख्याध्यापक संघाच्या प्रतिनिधींनी अध्यक्ष तानाजी माने, कार्याध्यक्ष आणि शिक्षक आमदार ज्ञानेश्वर म्हात्रे तसेच सचिव नंदकुमार सागर यांनी शिक्षणमंत्री दादाजी भुसे यांची भेट घेऊन यासंबंधी निवेदन सादर केले. त्यात समायोजनाची प्रक्रिया तत्काळ थांबवून शैक्षणिक वर्ष 2025-26 साठीचा सेवकसंच मंजूर झाल्यानंतरच पुढील पावले उचलावीत, अशी मागणी करण्यात आली आहे.
600 शाळांमध्ये एकही शिक्षक पद मंजूर झालेले नाही
15 मार्च 2024 रोजीच्या शासन निर्णयानुसार शैक्षणिक वर्ष 2024-25 चा सेवकसंच जाहीर झाला आहे. या पुनर्संरचनेनुसार राज्यातील सुमारे 600 शाळांमध्ये एकही शिक्षक पद मंजूर झालेले नाही. तितक्याच शाळांमध्ये शिक्षकांची संख्या निम्म्याहूनही कमी झाली आहे. यामुळे अनेक ग्रामीण आणि लहान शाळा प्रभावीपणे चालवणे अशक्य होणार असल्याची भीती व्यक्त केली जात आहे.
राज्यभरातील शाळा आणि संघटनांकडून याचिका
सेवकसंचातील या त्रुटींवर राज्यभरातील शाळा आणि संघटनांकडून उच्च न्यायालयात याचिका दाखल करण्यात आले होते. मात्र, न्यायालयाने या याचिका फेटाळले त्यामुळे शिक्षक समायोजन प्रक्रिया राबविण्यासाठी शिक्षण संचालकांनी 5 डिसेंबरपर्यंतची अंतिम मुदत दिली आहे.
विद्यार्थ्यांचे शैक्षणिक नुकसान
संघटनांचे म्हणणे आहे की अचानक केलेल्या समायोजनामुळे विद्यार्थ्यांचे शैक्षणिक नुकसान होईल, शाळा रिकाम्या पडतील आणि मराठी माध्यमावर मोठा परिणाम होईल. पुढील शैक्षणिक वर्षासाठी सेवकसंचात दुरुस्ती करून परिस्थिती सुधारण्याची मागणी शिक्षण विभागाकडे केली आहे.