एजन्सी, मुंबई: भारतीय हवामानशास्त्र विभागाने (IMD) शुक्रवारी मुंबई महानगर प्रदेश (MMR) आणि महाराष्ट्राच्या किनारपट्टीच्या कोकण पट्ट्यासाठी 12 ऑक्टोबरपर्यंत उष्णतेच्या लाटेचा इशारा जारी केला आहे.
उष्ण आणि दमट हवामान राहण्याची शक्यता
दक्षिण कोकणातील जिल्ह्यांमध्ये काही ठिकाणी उष्णतेची लाट येण्याची शक्यता आहे. तसेच उत्तर कोकणातील जिल्ह्यांमध्ये काही ठिकाणी उष्ण आणि दमट हवामान राहण्याची शक्यता आहे, असे आयएमडीच्या येथील प्रादेशिक हवामान केंद्राने म्हटले आहे.
कमाल तापमानात 2-3 अंश सेल्सिअसने वाढ
येत्या 48 तासांत महाराष्ट्रातील काही भागांत कमाल तापमानात 2-3 अंश सेल्सिअसने आणि त्यानंतर 1-3 अंश सेल्सिअसने टप्प्याटप्प्याने वाढ होईल, असे त्यात म्हटले आहे. तापमानात वाढ झाल्यामुळे नागरिकांना उकाड्यात त्रास होण्याची शक्यता आहे.
कमाल तापमान 37-39 अंशांवर
9 आणि 10 ऑक्टोबर रोजी महाराष्ट्राच्या अंतर्गत भागात काही ठिकाणी कमाल तापमान 37-39 अंश सेल्सिअसच्या दरम्यान राहण्याची शक्यता आहे, असे केंद्राने सांगितले.
एमएमआर (MMR) हा मुंबई आणि लगतच्या ठाणे, पालघर आणि रायगड जिल्ह्यांमधील नऊ महानगरपालिकांमध्ये पसरलेला एक विशाल शहरी समूह आहे.
