जेएनएन, पुणे/मुंबई: दूध उत्पादक शेतकरी आणि सर्वसामान्य ग्राहकांसाठी महत्त्वाची बातमी समोर आली आहे. गोकुळ आणि वारणा दूध संघांसह अमूल आणि मदर डेअरीच्या दुधाच्या दरात वाढ झाली आहे. या दरवाढीमुळे मुंबई आणि पुण्यात गोकुळ तसेच वारणा दुधाचा प्रतिलिटर दर 78 रुपयांवरून थेट 84 रुपयांवर पोहोचला आहे. तर कोल्हापूरमध्ये या दोन्ही दूध संघांच्या दुधाचे दर प्रतिलिटर 72 रुपयांवरून 78 रुपये झाले आहेत. दुसरीकडे अमूल आणि मदर डेअरीनेही आपल्या दुधाच्या दरात प्रतिलिटर चार रुपयांची वाढ केली आहे. त्यामुळे आधीच महागाईचा सामना करणाऱ्या सर्वसामान्य कुटुंबांच्या मासिक खर्चात आणखी भर पडणार आहे.
गोकुळ आणि वारणाच्या दुधाचे दर सहा रुपयांनी वाढले
कोल्हापूर जिल्हा सहकारी दूध उत्पादक संघ गोकुळने दुधाच्या विक्री दरात वाढ केली आहे. या दरवाढीनुसार कोल्हापूरमध्ये गोकुळ दुधाचा प्रतिलिटर दर 72 रुपयांवरून 78 रुपये झाला आहे. तर मुंबई आणि पुणे या मोठ्या शहरांमध्ये गोकुळ दुधाचा दर 78 रुपयांवरून 84 रुपये प्रतिलिटर झाला आहे.
वारणा दूध संघानेही दुधाच्या विक्री दरात वाढ केली आहे. वारणाच्या दुधासाठी कोल्हापूरमध्ये ग्राहकांना आता प्रतिलिटर 78 रुपये मोजावे लागणार आहेत. यापूर्वी हा दर 72 रुपये होता. तर मुंबई आणि पुण्यात वारणाच्या दुधाचा दर 78 रुपयांवरून 84 रुपये प्रतिलिटर झाला आहे. त्यामुळे दोन्ही प्रमुख दूध संघांच्या दरवाढीचा फटका ग्राहकांना बसणार आहे.
अमूल आणि मदर डेअरीचे दूधही महागले
गोकुळ आणि वारणापाठोपाठ अमूलनेही दुधाच्या दरात वाढ केली आहे. अमूल गोल्ड दुधाचा प्रतिलिटर दर यापूर्वी 72 रुपये होता. त्यामध्ये चार रुपयांची वाढ झाल्याने आता ग्राहकांना एका लिटरसाठी 76 रुपये मोजावे लागणार आहेत.
मदर डेअरीच्या फुल क्रीम दुधाच्या दरातही वाढ झाली आहे. यापूर्वी प्रतिलिटर 72 रुपये असलेले दूध आता 76 रुपयांना मिळणार आहे. त्यामुळे विविध दूध ब्रँडच्या दरवाढीचा परिणाम देशातील मोठ्या शहरांमधील ग्राहकांच्या खिशावर होणार आहे.
दूध उत्पादक शेतकरी नाराज; सहा रुपयांच्या वाढीची होती अपेक्षा
एकीकडे दूध विक्रीच्या दरात सहा रुपयांची वाढ करण्यात आली असताना दुसरीकडे दूध उत्पादक शेतकऱ्यांमध्ये मात्र नाराजीचे वातावरण आहे. गोकुळ दूध संघाने दूध खरेदी दरात प्रतिलिटर तीन रुपयांची वाढ केली असली, तरी सध्याच्या परिस्थितीत ही वाढ अपुरी असल्याचे शेतकऱ्यांचे म्हणणे आहे.
पशुखाद्य, चारा आणि जनावरांच्या देखभालीचा खर्च सातत्याने वाढत आहे. त्यामुळे दूध उत्पादनाचा व्यवसाय करणे शेतकऱ्यांसाठी दिवसेंदिवस कठीण होत चालले आहे. वाढत्या उत्पादन खर्चाच्या तुलनेत मिळणारा दूध खरेदी दर पुरेसा नसल्याची भावना दूध उत्पादकांमध्ये आहे.
सध्याच्या परिस्थितीत दूध उत्पादक शेतकऱ्यांना प्रतिलिटर किमान सहा रुपयांची वाढ मिळणे अपेक्षित होते. मात्र दूध संघाने शेतकऱ्यांना केवळ तीन रुपये वाढवून दिले. दुसरीकडे ग्राहकांसाठी विक्री दरात सहा रुपयांची वाढ करण्यात आली. दूध संघाने स्वतःचा तोटा भरून काढण्यासाठी ग्राहकांवर सहा रुपयांचा अतिरिक्त भार टाकला, मात्र शेतकऱ्यांना अपेक्षित दरवाढ दिली नाही, अशी नाराजी दूध उत्पादकांनी व्यक्त केली आहे.
