जेएनएन, नांदेड. माजी मुख्यमंत्री व खासदार अशोक चव्हाण आणि नांदेड जिल्ह्यातील चार आमदारांना उडवून देण्याची धमकी देत एका व्यापाऱ्याकडे एक लाख रुपयांची खंडणी मागणाऱ्या आरोपीला नांदेड स्थानिक गुन्हे शाखेने मुंबईतून अटक केली आहे. रवी उर्फ रविंद्र गौतम रोकडे (वय 39, रा. आष्टा, जिल्हा बीड) असे अटक करण्यात आलेल्या आरोपीचे नाव आहे. विशेष म्हणजे, आरोपी व्यवसायाने दिग्दर्शक असल्याची माहिती समोर आली आहे. या प्रकरणात आरोपीने तीन वर्षांपूर्वीच कट रचल्याचा दावा केल्याने तपासातून समोर आले आहे.

माहितीनुसार, आरोपीने एका व्यापाऱ्याला लक्ष्य करून त्याच्याकडे एक लाख रुपयांची खंडणी मागितली होती. पैसे न दिल्यास माजी मुख्यमंत्री अशोक चव्हाण यांच्यासह नांदेड जिल्ह्यातील चार आमदारांना उडवून देण्याची धमकी देण्यात आली होती. लोकप्रतिनिधींना जीवे मारण्याची धमकी देऊन व्यापाऱ्यावर दबाव निर्माण करण्याचा प्रयत्न करण्यात आल्याने या प्रकरणाचे गांभीर्य वाढले होते. 

या धमकीच्या प्रकारानंतर संबंधित यंत्रणांनी तपासाला सुरुवात केली. नांदेड स्थानिक गुन्हे शाखेने तांत्रिक माहिती आणि उपलब्ध पुराव्यांच्या आधारे आरोपीचा शोध सुरू केला. तपासादरम्यान आरोपी मुंबईत असल्याची माहिती पोलिसांना मिळाली. त्यानंतर स्थानिक गुन्हे शाखेच्या पथकाने मुंबईत सापळा रचून रवी उर्फ रविंद्र रोकडे याला शिताफीने ताब्यात घेतले. 

आरोपी व्यवसायाने दिग्दर्शक 

अटक करण्यात आलेला रवी उर्फ रविंद्र रोकडे हा व्यवसायाने दिग्दर्शक असल्याची माहिती समोर आली आहे. या प्रकरणात त्याने तीन वर्षांपूर्वीच कट रचल्याचा दावा केल्याने पोलिसांच्या तपासाला वेगळे वळण मिळण्याची शक्यता आहे. नेमका हा कट कशासाठी रचण्यात आला होता, त्यामागे आणखी कोणाचा सहभाग आहे का आणि व्यापाऱ्यालाच लक्ष्य करण्याचे कारण काय, याचा तपास आता केला जात आहे.