मुंबई. Maharashtra Rain: श्रावणात दमदार पावसाचे पुनरागमन होईल, अशी अपेक्षा असतानाच सप्टेंबर महिन्याच्या मध्यापर्यंतही राज्यात अपेक्षित पावसाची नोंद झालेली नाही. काही भागांत हलक्या सरी सुरू असल्या, तरी बहुतांश ठिकाणी पावसाने उघडीप दिल्याने वातावरणात उकाडा वाढला आहे. अनेक भागांत दिवसभर ढगाळ वातावरण आणि त्यानंतर ऊन-पावसाचा खेळ सुरू असल्याचे चित्र आहे. दरम्यान, आज मध्य महाराष्ट्र आणि मराठवाड्यात तुरळक ठिकाणी विजांच्या कडकडाटासह पावसाची शक्यता हवामान विभागाने वर्तवली आहे.

मध्य महाराष्ट्र, मराठवाड्यात पावसाची शक्यता

हवामान विभागाच्या अंदाजानुसार, 17 सप्टेंबर रोजी मध्य महाराष्ट्र आणि मराठवाड्यात काही ठिकाणी पावसासह मेघगर्जना आणि विजांचा कडकडाट होऊ शकतो. मात्र, हा पाऊस सर्वदूर सलग पडण्याची शक्यता नसून तुरळक स्वरूपाचा राहण्याची शक्यता आहे. त्यामुळे काही भागांत जोरदार सरी पडू शकतात, तर लगतच्या भागात मात्र पावसाची उघडीप राहू शकते.

मराठवाड्यातील काही भागांसाठी हलका पाऊस किंवा मेघगर्जनेसह सरींचा अंदाज आहे.रिसोडच्या हवामान अंदाजात 17 सप्टेंबरला हलका पाऊसची शक्यता नमूद करण्यात आली आहे. 

मुंबईसह कोकणात काय स्थिती?

मुंबई आणि परिसरात आज ढगाळ वातावरण राहण्याची शक्यता आहे. मुंबईतील विविध हवामान केंद्रांच्या अंदाजानुसार, हलका ते मध्यम पाऊस होऊ शकतो. मात्र आज मोठ्या पावसाचा इशारा देण्यात आलेला नाही. मुंबईसाठी हलक्या पावसाचा अंदाज असून कोणताही विशेष इशारा नाही. 

    मुंबईच्या कुलाबा भागासाठीही 17 सप्टेंबरला मध्यम पावसाची शक्यता दर्शवण्यात आली आहे. त्यामुळे शहरात अधूनमधून सरी कोसळण्याची शक्यता असली तरी पावसाचा जोर सर्वत्र समान राहणार नाही. 

    पावसाची उघडीप, उकाड्यात वाढ

    सप्टेंबरमध्ये पावसाचा जोर कमी झाल्याने अनेक भागांत कमाल तापमानात वाढ जाणवत आहे. पावसाची उघडीप आणि त्यानंतर पुन्हा वाढणारे तापमान यामुळे वातावरणात आर्द्रता कायम असून नागरिकांना उकाड्याचा त्रास जाणवत आहे. दिवसा ऊन आणि ढगाळ वातावरणाचा खेळ सुरू असल्याने काही भागांत वातावरण दमट बनले आहे.

    पुढील काही दिवसही संमिश्र स्थिती

    हवामान विभागाच्या उपलब्ध अंदाजानुसार, पुढील काही दिवस राज्यातील हवामानात मोठ्या प्रमाणात चढ-उतार राहण्याची शक्यता आहे. काही ठिकाणी हलका पाऊस किंवा मेघगर्जनेसह सरी पडतील, तर अनेक भागांत पावसाची उघडीप राहू शकते. त्यामुळे राज्यात पुन्हा एकदा सर्वदूर दमदार पाऊस कधी सुरू होणार, याबाबत सध्या निश्चित चित्र नाही. 

    शेतकऱ्यांसाठीही हा पाऊस महत्त्वाचा ठरणार आहे. पावसाची गरज असलेल्या भागात तुरळक स्वरूपाच्या सरींमुळे काही प्रमाणात दिलासा मिळू शकतो.मात्र पिकांसाठी आवश्यक असलेला सलग आणि समाधानकारक पाऊस न झाल्यास परिस्थिती चिंताजनक राहू शकते.